Yésus wu aboro wu bang, “Abulu. Niming gubernur, mating du abulu.”

3 No'ang wé, agama Yahudi o kpal éi kpal nuny gubernur ara sara mating, wu bang, “Ei óny do ahala pnene kurung dang aang.” Aang wé, sununy O ahala du, wu nu-nu ta'ana.

4 Wé, gubernur wói Yésus atana mi lami lolo, wu bang, “Aa nami o mating dopo ma'éhé dang só? Nami Aano'o ahala towong saah aang du. Aa dei wu aboro wé!”

5 Bó, Yésus wu aboro di mong nani, sang gubernur wu sahóir osaha.

6 Tun aring ana, Yahudi hining Paska o diwing pnene he, naim ba spiri bang mi du, nami towong nu wu tra'a ee, gubernur ano'o il. 7 Taping du mi du, nami hukung nu, aning Barabas. Turu mi nami apuny méd o teneng'él ara, o seel du ei Roma o perente abeling méd ei nami amini. 8 Paska o diwing du, mong wanang-wanang aang wé, naim towong gubernur Pilatus olap ho'ang wé, lowi-yid wu bang, “Niming gubernur! Paska o wéd mi aang! Wé tro'ony he, Niming gubernur nami spiri bang mi du, nu ano'o il, mong só wéde'e tun ba mi tali aang du'uny.”

9 Aang wé, gubernur wu aboro wu bang, “Na aanu wé ano'o il? Tro'ony he, na Yahudi o aawén doro wé atany? Yi wu ining me nani?” 10 Gubernur ta'any du'uny só bó, ei ahól agama Yahudi o kpal éi kpal nuny Yésus ara ho'o ene du, o sele he nami Ara saha éile.

11 Bó, agama o kpal éi kpal nuny wa naim towong ahoirlang, du'uny ee sununy gubernur abang, wu bang, “Ni Ei du wu ni aa'ai! Barabas wé atany!”

12 Aang wé, gubernur wói sununy atana mi lami lolo, wu bang, “Du'uny he, na naab wé pnene wa Yésus ba, nami o lowi Yahudi o aawén óny do o hadana?”

13 Wé, sununy so baarpi lowi-yid wu bang, “Óó mong Amini óó! Paku aarapa ti ta haling!”

14 Aang wé, gubernur sununy atana, wu bang, “O ahala naba? Na prese aang bó, O ahala den ar dang!”

Bó, nami lowi-yid mong wu ta, wu bang, “Óó mong Amini óó! Sono'o paku aarapa ti ta haling!”

15 Naim towong óm ano'o mi no'o éile wé, gubernur ei Barabas wé ano'o il, sununy éi ining ata'ai. Wé, ei nami bu'ung éi nami prente ee sang cambuk puny Yésus wrahang.^a Wrahang no'ang wé, soldaij nuny Yésus méd ar sang ee, aarapa ti ta paku du'uny.

16 No'o he, soldaij nuny Yésus baling ara sununy o bang hemeng mati lowa. Du mi du,^b sununy so teneng'él batalion nu o lowi. 17 Aang wé, sununy kondo lou ungu, méd Yésus ene miholo mong só wéde'e aawén nuny o kondo aning. Aang wé, nami ti mang o aabi éi atang mang hanang. Wé sununy na du méd Yésus o long tamang mi ading butu, wu oorong aang wé, awóhó-atele mong só wéde'e nami aawén balolo awóhó-atele topi long tamang du'uny.

18 Wé, sununy ho'or-ho'or éi awóhó-atele, o óm mi he, wu bang, “Yahudi o aawén wu aada!” 19 Wói wu ata'ai he, nami saan'no'o Yésus apung madang mi li'i wu aada. Aang wé, nami parang apung wa'a wu pahur mi lami lolo. Wói wu ata'ai he, naim ti bo'o puny O long mi bihi, wu lami lolo. 20 Naim biih aang wé, nami kondo lou du hing wewe. No'ang wé, O wene wóiméd Ene puny. Aang wé, nami Ara kota Yerusalem mi hele, Ara sang aang wé, paku méd aarapa ti ta haling sang so wu mini.

21 Taping sununy Yerusalem mi hele, sang se hama mi sununy nami nu kota Kirene mi ho'o ahól. Aning Simón. Ei du, Aleksander méd Rupus omong kai. Sa Yerusalem laang ano'o bó, soldaij nuny abi'ing ahowo Yésus o aarapa ti tewéng.^c 22 Nami Yésus baling ara sang leng nu mi, leng du aning Golgota. (O tamuju du wu bang, long kotong éi leng.) 23 Leng du mi, nami anggur lóhóny dawang ta aang duru wé, naim méd Yésus en na, du'uny ee Sa sawaha ma'ala du atu'ui no'o. Bó, Yésus óm wuma dang. 24-25 Nami Yésus atarang óm somidi aang wé, paku. Pa ód ti'inu lalami, nami aarapa ti du atele atóhóny. Aang wé, soldaij nuny lot abi'ing, aanu só pa Yésus o wéne méd séile.^d 26 No'ang wé, nami ti ahang nu ta na huul méd Yésus olong doro ara hama mi paku haling wu bang,

Mating pa'a dopo sano'o o sele ano'o ee, nami Yésus hukung. 27 Du mi didi, sununy nami na ta'au-na dulu piir aalu paku amini aarapa ti ta. Piir nu wa Yésus atang tain le mi, piir nu wa Yésus atang wé'éng le mi. 28 [Du puny Lahatala Am Pa'a tuur mi huul aang du ano'o ana, wu bang, “Nami pnene wa O hadana du mong só wéde'e nami saha pnene aning.”]^{e f}

29 Naim towong ba du lolo sang du, Yésus aarapa ti ta hiil du, sununy dunu ahól. Aang wé, sununy sawél awi no'ang wé, Yésus ebiti-eng'él aarapa ti ta wu bang, “Bah! Aa wu bang he, Lahatala o Aa'omi Bang Sele du, Aa abereng aa'ol aang wé, mi taring toow he, Aa wói bakung waling, u?^g 30 Aa dei aarapa ti ta hele, Aano'o il, ni ee dunu! Du'uny wé, ni Oo actno'o ahól Aaring du Lahatala o Ei.”

31 Agama Yahudi o kpal éi kpal nuny méd agama o tunggur nuny di Yésus ebiti-eng'él, wu bang, “Sa nami beng ano'o il-luling aang bó, ma Sara hama he, Sa sano'o il-luling saha! 32 Sa Saning pei wu bang, ‘Kristus’, naim ba turu mi Lahatala wu peiha'a ang. Naim beng wu bang Ei óny do Israél o Aawén. Aring du abulu só he, Sa séi aarapa ti ta hele ee pi edunu wé. Du'uny wé pi percaya wa Ara hama no'o.”

Nami piir aalu ba ara haam-hama aarapa ti ta hili didi, Yésus ebiti-eng'él.

33 No'o he, wéd bui titi mi, ku'u parang leng du ta hele balói piri sang wéd ledeng. 34 Ód towo he, Yésus saam mati mi Aram mating mi lowi-yid wu bang, “Eloi! Eloi! Lema sabaktani?’ (O tamuju he wu bang, “No Lahatala! No Lahatala! Naab éi wé, Aa Aamoto Nene do'ony?”^h

35 Nami piir dén ara du mi tóhé du, Yésus am pa'a ma'éhé. Wé, sununy wu bang, “Bah! Yi baarpi aalepeng wé. Ei Élia o lowi hé, Lahatala aléb doro-aming taporo turu mi, u!” 36 Aang wé, Nami nu te'eng-te'eng wa lotong méd anggur lóhóny aang du ara talói. Wé, ei lotong du dopong aming puny te'e aang wé, atele midi Yésus aim taporo atól du'uny ee Sa dutu. Aang wé, aring ei du mating wu bang, “Dunu wé! Ha'ai wé Élia ho'o Ara aarapa ti ta hele.”ⁱ

37 Aang wé Yésus lowi-yid wói mi nu ta, no'ang wé, Sa mini.

38 Móny Aa'omi Bang Sele mi du, kabala mati nu ba, hél haling ara Lahatala o Bang Óm so mi Madulung du ateleng. Taping Yésus o aa'any hi'i he, aring kabala mati du rat mi o aalu, tóny o toporo aadang le mi sang póny o toporo war le mi.^j

39 Tóny Golgota mi du, soldaij o mati nu Yésus o aarapa ti along tóhó, wu bu'ung. Taping Yésus o mini du sa dunu ahól, ei so mi se'udu. “Batipa'a, óó! Ei óny do, actno'o Lahatala o Ei so, óó!”

40-41 O óm mi du, nami obo hining piir dén móny lete tóhó Yésus o mini edunu. Sununy du turu mi móny Galelea mi Yésus wu karang. Sununy aning, Salome, Maria ba Magdala bang mi ho'o, wóiméd Maria nu (Yakobus awolo méd Yoses^k owo kai), wóiméd nami obo hining towong beng ba, Yésus ara hama-hama móny Yerusalem mi ho'o.^l

42-43 No'o he, nami piir nu se ebulu lap wélung ee, Yésus o tawén du, ara aarapa ti ta hele. Ei du aning Yusup, ei kota Arimatia mi ho'o. Méd Ei du agama Yahudi o pengadilan éi majelis. Ei di óm no'o. Méd ei Lahatala o perente adanang hé.

Yésus o miin du, hair Jumat ara hama. Mi dilele he, Yahudi hining o aa'omi éi wéd ara hama. Duur ba aring hair Jumat ara hama du, Yusup Arimatia éi óm du, Yésus o tawén soturu ara aarapa ti ta hele óm ma. Aang wé, sóm ano'o dumi gubernur Pilatus o lap sang ee, abang Yésus o tawén wu bang. 44 Taping gubernur ma'éhé Yusup na doop wu bang, ei wu sahóir. Aang wé, ei wu bang, “Batipa'a óó! Aring Ei hara'any mini! Néi nóm du du'uny dang!”

Aang wé, sa nami ahowo sang soldaij o mati o lowi, wé sa atana wu bang, “Tro'ony, ee? Yésus du miin aang, me dei?”

45 Soldaij o mati du wu aboro wu bang, “Ei actno'o wéde'e miin aang, niming.” Gubernur ma'éhé du'uny duru wé, ei Yusup luling ene sang Yésus o tawén méd.

46 Wé, Yusup sang butung ka habara o wali mati wé wél aang wé, ei Golgota lang. Wói he sa Yésus o tawén du ara aarapa ti ta hele. Tawén du, ei butung ka puny balói no'o-no'o. Taping du mi du, nami dei wédwé wui bini nu ód. Aang wé, nami Yésus o tawén du teweng ara wa benye lowo du mi meng. No'ang wé, nami wui halala mati nu aa'olo puny tawén lowo eng wu tele no'o-no'o. No'ang wé, Yusup nuny saboro.

47 Aring taping du mi du, Maria ba Magdala bang mi ho'o méd Maria beng (Yoses owo kai), di so mampi sang leng du mi. Leng ba nami mi Yésus tró'óng du, sonang aalu edunu méd wuma no'o-no'o.