Tuhan Yésus Ei wói so wéceng!
(Matius 28:1-8; Lukas 24:1-12; Yohanis 20:1-10)
16
Mi dilele he, hair saptu, Yahudi hining o aa'omi éi wéd. Wéd mudi ano'o he, Maria ba Magdala bang mi ho'o, Maria beng du (Yakobus owo kai), méd Salome, sang yiping mneme wél, du'uny ee dilele sununy witi sang Yésus o tawén ta bahiti, Yahudi o hada éi aasala ata'ai. 2 Wé, hair Saha lalala mi, sonang towo tawén eng taang. 3-4 Sang se hama mi he, sununy mi sara mating wu bang, “Bati pa'a óó! Wui halala mati ba tawén lowo eng wu tele he du, aanu so pa ahodo beng mi meng no'o ee? Pinang towo óny do den kuwa'a dang, wui du mati bi'i!”Bó sununy sang leng du mi, sununy dunu he aring wui du la'ol aang. 5 Aang wé, sununy tawén lowo óm lowa. Bó sununy sahóir osaha, o seel du sununy dunu ei awolo piir nu sununy atang tain le mi mihé hé, wene wele madala wé puny. 6 Aring ei loti awolo du, sununy ara mating wu bang, “Yi ha'ai bróic ei! Na ahól yi ho'o Yésus Nasaret hining lap, ba nami amini tóny aarapa ti ta u. Ei óny do mi dang aang, Ei wói so wéceng aang. Ma dunu, leng ba nami Yésus o tawén méd mimeng óny du, so óh aang. 7 Wé, yi sono'o hara'any yiboro! Sang Pétrus nuny ar mating wu bang, Yésus wói so wéceng aang. Ei soturu lami móny Galelea laang aang. Pa sununy sang doop mi Ahól aang, tuur mi Sa wu bang tro'ony aang du, ara hama. Wéé, yi sono'o yiboro!”a
8 Taping nami obo nuny du, dunu leng du so óhó, sununy se'udu. Aang wé, te'eng luling lo hele. Wé, sununy hara'any-hara'any saboro. Sununy se hama nami den ara mating dang, o seel du sununy bróic osaha.
Tuhan Yésus Ei sang Maria ba Magdala o nami ahól b
(Matius 28:9-10; Yohanis 20:11-18)
9 Hair Saha lalala mi du, Yésus o aa'anyang ta sang Saring méd Maria ba Magdala o nami o peteng. Maria Magdala o nami du, turu mi seteng wucto tamang bó, Yésus seteng du alol aang. 10 Sa dunu Yésus ahól aang wé, sa sang nami baarpi ba turu mi Yésus ata'ai du, ar mating. Sununy dei talói mihi sóm kurung mi ahany Yésus o mini du wu tanut hé. 11 Aang wé, Maria sununy ar mating, wu bang, “Naab éi wé yi baarpi yióm dei kurung hé? Yióm ano'o kurung ei, Yésus wói so weceng aang! Dei wéd wé, na dunu Ahól do!”
Bó, sununy baarpi éi aboro wu bang, “Bah! Aa kaluwi ei!”
Tuhan Yésus Ei wói Saring méd naim piir aalu o peteng
(Lukas 24:13-35)
12 No'o he, Yésus o nami ata'ai-alolo piir aalu bang nu lang. Sang se haam mi, Yésus Ei Saring méd sununy o peteng bó, Awaha du wói beng aang. Lu'ung dang he, sununy Apung ahól aang. 13 Aang wé, sonang aalu saboro sang so teneng'él beng ar mating, wu bang, “Baa! Yi aalepeng wé! Wéde'e, ni se haam mi Yésus ahól!”
Bó, sununy o teneng'él wu aboro, wu bang, “Aaa! Yi kaluwi téhé'é!”
Tuhan Yésus Ei Saring méd So nami ata'ai-alolo baarpi o peteng
(Matius 28:16-20; Lukas 24:36-49; Yohanis 20:19-23; Tangwala nuny o Tut 1:6-8)
14 No'o he, Yésus So nami ata'ai-alolo piir air nu waling nu du, Sa saring méd o peteng, taping sununy mihi na adi hé. Sa sununy ene ahól, wu bang, “Bah! Yiolong paluhu séi solo beng ee! Nami yiara mating wu bang nami seng pa'a puny dunu Nahól aang, bó yi o actno'o ahól di nani óó! Yi baarpi Wu bang, nami kaluwi so! Wéé! Wéd doro, Nóu Neng mi ho'ang do. Na actno'o miin aang, bó wéd do, Na wói No wéceng aang! Wé yi baarpi yieng pa'a puny Ne dunu.
15 Duru ba, wéd do yi uil sang pli'i-mati aring ana Néi Tut No'o wu nami baarpi ara mating.c 16 Naim ba Naring percaya méd srani, Lahatala pa ano'o il-luling méd sa pa sang sorga mi Lahatala ara talói weceng sang so wu eme. Bó, aanu só Naring percaya dang he, sa pa hukung ahól aang, Lahatala pa alolo luling lo hele sang so wu eme. 17 Naim ba, Naring percaya du, sununy pa na empiri ar leng, o óm mi he naim baarpi ahól sununy o kuwasa ara, actno'o óny do Lahatala mi ho'o. Duru ba sununy Naning puny seteng alolo no'o. Mating ba sununy ahól dei du, Lahatala sununy ene puny, du'uny eesa sununy puny. 18 Masi sununy món ari'ing apuny méd sununy dawang saha na di, sununy miin dang. Du'uny didi sununy satang méd naim malodi tameng ee, aa'omi naim malodi du ara hama, naim malodi du tabiring.
Tuhan Yésus Ei latele sorga lang
(Lukas 24:50-53; Tangwala nuny o Tut 1:9-11)
19 Sa so nami ata'ai-alolo ara mating no'ang wé, Yésus Ei latele sorga lang. Sang Lahatala atang tain le mi mihi aang wé, Sonang aalu mihi haam-hama perente puny.d
20 No'ang wé, O nami ata'ai-alolo O prente ata'ai. Sununy sang leng aring ana Yésus o Tut No'o wu mating nami ene ahól. Wé, Lahatala kuwasa méd sununy ene, du'uny eesa sununy na empi-piri ba Yésus wu sununy ara mating aang du mi pnene. No'ang wé, naim towong Yésus percaya, wéde'e sununy baarpi ahól aang, Tut No'o du actno'o abulu.
[MARKUS ÉI TUT O TAPORO TA, SURU MI TURU BENG ATA'AI e
9 Taping nami obo piir towo du, sang Pétrus nuny ahól, naab wé ei awolo nu móny tawén eng ta wu mating du, sununy baarpi wu bang atépung. 10 Aang wé, Yésus so Seng mi So nami ata'ai-alolo prente ee sang Tut No'o wu mating leng aring ana, sang pli'i-mati o taporo ta. Tut No'o óny do sano'o se'ebulu wu nami etubu du'uny ee, Lahatala nami ano'o il-luling ma sununy o saha-ahala du ara hama ee, sununy weceng Lahatala ara sang so wu eme.
Tut No'o óny do, actno'o abulu empiri. Duru wé ho'o wéd do mi, séi ara he, wói sohing dang.]