2 Bó, Yésus wu aboro wu bang, “Bang óny do actno'o teng mi no'o! Bó lu'ung dang he, wui óny do nami apó'ó-abutung mi nu.”

3 No'o he, Yésus méd O nami ata'ai-alolo ara Saitun biin taang, aang wé mihi óm Aa'omi Bang Sele o hadana. No'ang wé, O nami ata'ai-alolo piir uut ma ara mihi sara mating. Aring du Pétrus, Yakobus, Yohanis, Anderias. 4 Sununy atana wu bang, “Niming! Wéde'e Aa mating du Aa dei wói wu mating. Taring dén ta wé Oo mating pa'a du mi ana? Wóiméd o wu tubu du, tro'ony?”

5 Aang wé, Yésus wu aboro wu bang, “Aasala yi wu bu'ung no'o-no'o, ee! Du'uny wé nami yiara kaluwi dang. 6 Pa mi nu mi, nami be-beng den ho'o sadele ba'a, wu bang, ‘Naring óny do Kristus, naim ba turu mi Lahatala wu tuub aang.’ Sununy naim towong ara kaluwi. 7 Yi pa nami sara mali dunu ahól, nani he yi pa mali tale'e taru-taru mi, o hami ma'éhé, yi ha'ai wé bróic ei. Pnene dopo'ony du uil ara wé, bó taping o taporo ta mi dei. 8 Mi nu mi pa, leleng nu wa leleng beng ara mali. Negara nu wa negara beng ara mali. Taur-taru mi taiwé'é mati tóhó. Hili mati hele! Du baarpi sano'o o wu tuub ano'o, mong só wéde'e obo hining tawany o na ma'ala aning.

9 Wé, yi uil wu bu'ung no'o-no'o, óó! Pa mi nu mi, nami ho'o yi puny yiara agama o pengadilan laang. Wóiméd nami aa'omi bang óm mi yiring bihi. Wói he, nami yipece yiara nami perente puny o lap sang, o sele yi Nata'ai éile. Bó dopo sano'o luling nu, yi puny Naning wu mating. 10 Wé, Lahatala O nami uil sang Nei Tut No'o du wu mating wa leleng-bala towong óny pli'i-mati ta du baarpi ene ahól wé, taping o toporo ta du ho'o. 11 Wuma, óó! Mi nu mi, nami yipece yiara sang pengadilan laang, yi ha'ai bróic wu bang, ‘Na pa naab mating wé wu bang? Pa na naab wé puny wu aboro?’ O taping du sang mi an aang he, Lahatala O Roh Madulung pa yióm mi, wé yi mong Ata'ai mating.^a

12 Bang nu óm mi, o nami den Naring percaya he, pa o di'ai só, o se lap ee amini. Ei kenewe só Naring percaya, pa omong kai só sona amini. Ee owo-omong só Naring percaya, pa sununy o ei só, sona amini. 13 Wé, pa mi nu mi, nami yiara saha empiri, o sele yi Naring percaya du éi. Só bó aanu só atu'ui sang o toporo ta he, uil Lahatala il-luling méd ene.”^b

14 Yésus wói mating wu bang, “Nami saha empiri nu pa ho'o. Ei sang Lahatala o Aa'omi Bang Sele, o palolo ba sa mi tóhó éi dang du, lomidi. Sang ei leng du ano'o karo'o-kamai. Duru wé Lahatala samoto méd leng du ene, aang wé leng du méd meng. Yi dunu aring na du ahól he, yi beng wala, óó! (Aanu so mating pa'a óny do ta'ana he, saring di uil beng wala!) Aring du sano'o o wu tuub ano'o wu bang, o wéd du ho'o yi sa'ar mi aang. Dunu na du ahól aang he, naim ba propensi Yudea mi du hara'any tóhó te'eng bini taang.^c 15 Wé uil hara'any-hara'any te'eng wé, du'uny ee ha'ai saha ara pa'a ei. Den bang óm mi hele aang he, wói saboro bang laang, na méd ei. 16 Didi nami ba móny butu mi, wói saboro bang loho'o nowong méd ei. Bó te'eng so abulu sang.^d 17 Naim ba tóm mi esaha du, nami tang óhó dang méd naim ba dei to ei en hé. O seel du sununy hara'any te'eng saha. 18 Wé mi no'o le he, yi aa'omi Lahatala abang ee, aring na saha du nui-aarib o taping mi ho'o ei. 19 Wéd du óm mi du, karaka empiri ara. Móny taping Lahatala pli'i-mati atén sang ho'o wéd do mi, nami karaka óny du ahól dei. Taping wa ma he di nami karaka ony du ahól dang.^e 20 Lahatala taping du ano'o to'ong dang he, pa nami piir nu di wéceng du atu'ui saha. Bó Lahatala so naim ba Sa wu tara' aang du Sa esaha, duru wé Ei sél karaka du o wéd ano'o to'ong.

21 Pa sang aring sél du mi aang he, yi pa ma'éhé naim wu bang, ‘Dunu wé! Kristus ara óny do mi!’ Bó nami beng didi wu bang, ‘Kristus ara móny doop mi!’ Bó yi ha'ai wu aalepeng ei, ee! 22 Masi nami den hele sadele ba'a wu bang, ‘Naring do Kristus!’ Nami beng wu bang, ‘Naring do, Lahatala aléb doro-aming taporo.’ Sununy pa seteng o kuwasa puny na empiri ar leng, pu'uny nami adiming naim aboro. Sununy pnene ano'o tro'ony ee, Lahatala O nami amudi wé du, sununy o kaluwi pnene! 23 Bó yi bu'ung no'o-no'o, ee! Sél karaka mati du ho'o dei he, Na yisóm yino'o dil wuma aang!”

24 No'o he, Yésus So nami ata'ai-alolo ara mating du wói wu hamowo, wu bang, “Wéd susu nuny du oh'ang he,

26 No'ang wé, nami baarpi dunu Nahól, Actno'o Namino'o Abulu óny do. Na pa tóny bulung ta lou-tawé'éng óm mi hele. Wóiméd naim baarpi dunu No kuwasa ahól méd No lele-madala leleng air nu didi!^h 27 No'ang wé, Na Lahatala e'atang sorga mi du, prente sang naim baarpi talói, naim ba Na wu tra'a aang óny du, móny pli'i-mati o taporo ta, móny wéd pó'ó mi sang wéd mudi mi, móny wé'éng le mi sang tain le mi.”

28 Yésus So mating pa'a hamowo wu bang, “Na o ara hama méd du, mong só wéde'e ti aning. O behe ba'ói aang he, wéd dang o taping wanang-wanang aang. 29 Du'uny di, wéd susu-ma'ala ho'o, yi ahól mong só wéde'e Na wu bang aang du'uny, No ho'o o sél du, wanang-wanang aang. 30 Wéd do, aalepeng no'o-no'o! Naim towong ba weceng óny do, den miin dei he, wéd susu-ma'ala du ho'ang. 31 Masi bulung méd pli'i-mati óny do sohing di, Naam pa'a óny do sohing dang.

32 Yésus wói mating wu bang, “Namino'o nu den No ho'o o sél du ahól dang, ód dén aning wé, Na wói Naboro ho'o. Lahatala e'atang towong sorga mi di ahól dang. Naring didi, ahól dang. Bó Niming Kai sóu solo ahól.ⁱ 33 Duru wé, yi uil wu bu'ung no'o-no'o, wéde'e yi ahól dang, dén wé o sél mi.

34 Lu'ung dang he, Na sang aang bó, Na pa wói Naboro ho'ang. Mong só wéde'e bang o aaning ba pli'i lete laang bó, o bang so tóhé. Sa so mangsi ahowo bang wu karing no'o-no'o. Aang wé, Sa so mangsi nuny du kreseng méd e dlam. Sa nami sa'ar bu'ung du prente ee, bu'ung no'o-no'o sang sa so wu ho'o.^j 35 Yi uil bu'ung dilu'u-dilele, o sele he, sél taru mi wé bang o aaning ho'o du, yi ahól dang. Wéd hele mi ho'o me dilu'u tun hama mi ho'o, wéd saha mi ho'o me wéd pó'ó bala mi ho'o, eeme dén wé, du yi ahól dang. 36 Ha'ai mi se-sebung óhó wé, sa ho'o yihól yi mopo aru'u hé.

37 Wé naab wé, Na wu yiara mating óny do, Na wu naim beng di ar mating wu bang, ‘Yi baarpi uil wu bu'ung no'o-no'o, No ho'o adanang.”’

[Yésus tóny Saitun biin ta So nami ata'ai alolo ara mating sang dopo'ony meng.]