Tuhan Yésus nuny Yerusalem laang, naim towong Aning wu trany, mong só wéde'e naim mati aning
(Matius 21:1-11; Lukas 19:28-40; Yohanis 12:12-19)
11
Taping sununy sang kota Yerusalem along, sununy bang aalu mi, Betpage méd Betania, Saitun bini adi'i ta.a Yésus nuny du mi so aair mong papané'é. Aang wé, Ei So nami ata'ai-alolo piir aalu ahowo soturu. 2 Sa wu bang, “Yinang aalu yituru móny bang dopo lang. Yi sang bang du mi he, yi pa keledei bowo nu, dunu ahól, nód ara du mi. Nami tamihi didi dei. Yi sang o hiwang aweteng aang wé, abi'ing óny do loho'o. 3 Bó, nami den yitana wu bang, ‘Naab éi wé yi nami o keledei du, o hiwang aweteng aang wé, ar sang?’ Yi wu aboro wu bang, ‘Ni tuwung óm ta mihi wuma. Sa ta mihi no'ang he, Sa pa ta howo ho'ang.”’ 4 No'ang wé, sonang aalu sang, sununy dunu keledei bowo nu nód ara bang nu o sa'ar mi se adi'i mi tohé. Wé sununy o hiwang aweteng aang wé, ar sang. 5 Bó naim ba leng du mi tohé du, ta'any wu bang, “Uu! Naab éi wé, yi naim o keledei du atany?”
6 Aang wé, sununy wu aboro wu bang, “Ni tuwung óm ta mihi wuma. Sa ta mihi no'ang he, ni pa ara ho'ang.” Aang wé, naim beng dumi so mihé bó sonang aalu keledei du abi'ing ara sang. 7 Sununy abi'ing ara Yésus o lap sang. Aang wé, sununy so nowong méd keledei amoto ta meng, no'ang wé Yésus midi ta mihi.
8 Taping sununy kota óm lomidi ano'o, di naim towong so nowong, so sanai méd se mi pepe. Nami den wói sang lei béhé se adi'i ta horo witib ho'o se óm hama mi ahuling meng. Pnene dopo'ony du, puny wu aada ahól wa Tuhan Yésus o se mi, o wu tubu éi. Mong só wéde'e aasala wa nami mati towong apung lap ara bang loho'o du'uny. 9 Wé, nami Yésus Ata'ai eden-ewalowi, den Yésus apung madang lolo, amoot lolo. Nami wu oorong aning wu lowi wu bang,
“Hosana! Pi Lahatala Aning wu trany!c
Lahatala wuntu-weceng méd naim ba Aning puny ho'o du ene,
o seel du, Lahatala Só ahowo ho'o!d
10 Hosana! Pi Lahatala Aning wu trany!
O seel du, Lahatala óm aawén Daut o perente wói awóhó wuma!
Hosana! Pi Lahatala Aning wu trany!
O seel du, Lahatala tóny bulung o mi lawén mi, perente puny aang!”
11 Sang kota óm mi aang wé, Yésus méd o nami ata'ai-alolo ara wa Lahatala O Aa'omi Bang Sele éi hemeng bo'o mi. Wé Yésus bang du walowi wu dunu no'o-no'o. Bó sél ar dang aang, wé sununy saboro móny Betania bang lang.
Tuhan Yésus Ei ti nu prente wé, aring ti du wói hiil dang
(Matius 21:18-19)
12 Mi dilele la-lala mi, sununy lami Betania méd meng aang wé, saboro kota Yerusalem laang. Bó sang se hama mi he, Yésus óm hili. 13 Ti sele nu se adi'i mi tóhó du, Sa dunu ahól. Naim biaasa o piir adi.e Wé Yésus ti du o seel lowa ee, o piri edunu ara eeme nani. Bó sang ti du o sele mi, Ei dunu ti du o piri den ahól dang. Aasala o taping hili o sél mi só. O behe balolo o taping mi. 14 Wé Yésus ti du, mating wa ara hama wu bang, “Aa oo piri Neen dang wé, wéd do mi, aa wói oo piri di méd naim beng en dang!”
O nami ata'ai-alolo nuny O mating pa'a trowi du, ma'éhé.
Tuhan Yésus Ei Aa'omi Bang Sele o óm lomidi. No'ang wé Ei dón du mi du abereng wewe
(Matius 21:12-17; Lukas 19:45-48; Yohanis 2:13-22)
15 No'o he, sununy so abulu lami sang Yerusalem mi aang wé, Yésus wói Lahatala o Aa'omi Bang Sele óm lomidi. Aa'omi Bang Sele o hemeng mi du, nami hait den ano'o dón leng. Wé bulung hiu ba nami o ma'ala méd puny Lahatala wu aada éi du, sununy du mi wail. Dunu na du ahól duru wé, Yésus wa aang wé, nami nuny du alolo luling lohele. Meja towong ba nami ta seng telung du, Ei abiti. Méd de'e ba nami ta hiu nuny du wail du, Ei atele dód. 16 Aang wé, Ei nami baarpi ehapa, na den wói puny saboro Aa'omi Bang Sele o hemeng ani hama du lool dang. 17 No'ang wé, Sa nami awu wu bang, “Naab wé Lahatala aléb doro-aming taporo hulu meng du, yi ahól aang, wu bang, ‘Na No Bang óny do atén du'uny ee, bang-pli'i leleng air nu o namino'o ho'o óny do mi aa'omi.’ Bó yi ano'o nami nata'au-nadulu éi talói o leng!”f
18 Taping agama Yahudi o kpal éi kpal nuny méd agama o tunggur nuny Yésus naab wé pnene du ma'éhé, sununy óm Yésus ata'ai. Aang wé, sununy o se lap tro'ony ee Yésus amini. Bó sununy bróic, o seel du naab wé Yésus wu nami awu du naim towong esaha empiri.
19 Taping wéd sang mudi ano'o, Yésus nuny ara kota Yerusalem mi hele wé, sununy saboro sang Betania bang mi tara.
Pi actno-no'o Lahatala percaya he, naab wé pi wu Abang Ei méd tene
(Matius 21:20-22)
20-21 Mi dilele lalala mi, sununy wói saboro Yerusalem lang. Se hama mi, sununy ti uwung mi ba Yésus mating wa ar hama du, sununy lami mi ali. O nami ata'ai-alolo wu sahóir osaha, ti du mini sang o aali'ing di baarpi ta'ata óhó. Yésus o mating pa'a uwung mi du, Pétrus wuma. Aang wé, sa mating wu bang, “Niming! Dunu wé! Ti ba uwung mi Aa ara beye u, miin aang!”
22 Wé, Yésus aboro wu bang, “Actno'o, aasala yiring di Lahatala percaya abuul-abulu. 23 Yi percaya abuul-abulu he, yi bini nu prente saring weteng tang lang, ei tang lang. Aasala yi yióm ahang de-den puny percaya ei! Yi uil Lahatala percaya abuul-abulu.g 24 Wé wuma óó! Aasala yi actno-no'o percaya wu bang, Ei pnene no'o, naab wé yi wu Lahatala abang he, uil Sa méd yiene! 25 Bó yióm dei nami beng ata'ai hé he, yi uil nami du ara no'ang wé, aa'omi. Du'uny wé yiming Lahatala tóny sorga mi du yi saha-yi ahala wu ta'ana dang. 26 [Yi na saha den yióm mi tró'óng wa nami ara hama, méd nami o ahala du yi so wu ta'ana hé he, du'uny didi Yiming tóny sorga mi di, yi ahala so wu ta'ana he.”]h i
Nami Tuhan Yésus Éi hak mi satana
(Matius 21:23-27; Lukas 20:1-8)
27 No'o he, sununy so abulu lami. Taping sununy sang Yerusalem mi, sununy wói saboro Lahatala o Aa'omi Bang Sele óm lomidi. Sununy sang bang hemeng mi he, agama Yahudi o kpal éi kpal nuny, agama o tunggur nuny méd hada o tuma'a bala ho'o. 28 Aang wé, sununy Yésus ara mi satana wu bang, “Aanu só uwung mi Aahowo ho'o bra'ang ar leng óny do mi? Aanu só hak méd Eene!”
29 Bó, Yésus ahól nami o se lap ano'o mudi só. Aang wé, Sa wu aboro wu bang, “Naring di wói yitana. Yi Nei aboro wé, Na yiéi wu aboro. 30 Nei Nóm yitana wuma du do'ony, yi baarpi Yohanis, nami srani éi nami du apung ahól, ee? Wé aanu só ahowo sang nami srani? Lahatala eeme, namino'o?”
31 Aang wé, sununy tanut sang ho'o ee, sara kahany wu bang, “Ó'a! Piring ta muju aang, óó! Pi mi sebung wu bang, ‘Lahatala só ahowo’, Ei di wói wu bang, ‘Du'uny he, naba ei wé yi Yohanis percaya dang!’ 32 Bó pi wu bang ‘namino'o só ahowo’, dopo pi wu bang he, nami tóhó sara taburung. Wéde'e sununy ahól Yohanis du, Lahatala aléb doro-aming taporo.”
33 Aang wé, sununy wu aboro wu bang, “Ni ahól dang!”
Wé, Yésus wói wu aboro wu bang, “Aaa! Du'uny he, aanu só wói Nahowo du. Naring di wói wu yiara mating dang.”