Parisi hining se lap ee, Tuhan Yésus amuju ma nami satany éi ara hama
(Matius 19:1-12; Lukas 16:18)
10
No'o he, Yésus méd O nami ata'ai-alolo ara propensi Yudea lang, méd bang beng-pli'i beng móny Yarden mól o wéd pó'ó madang ara hama. Naim towong leng aring ana mi ho'o Yésus o lubung. Sa nami awu mong só wéde'e taping mi sali du'uny.2 Parisi hining piir den-den ho'o ee, welung o se lap amuju óm ma. Sununy ta'any wu bang, “Pi agama éi hukung-éi prente ata'ai, nami loti nu obo méd aang he, sa só obo atany no'o me nani?”
3 Yésus aboro wu bang, “Wuma wé! Hukung-prente wa loti-obo ereng'e ba Musa méd teen aang du, wu bang tro'ony?”
4 Sununy aboro wu bang, “Musa éi hukung-éi prente wu bang, nami sahi'i-saweteng no'o, aasala suru tahi'i-taweteng só turu méd só obo ene wé.”a
5 Yésus wu aboro wu bang, “He! Aalepeng ee! Yi long paluhu eile, duru ba Musa hulu du'uny! 6 Yi ha'ai wé tut aa'anyang ta du wu sibing ei, Lahatala bulung-pli'i atén o taping mi wu mating du, huul wu bang,
‘Lahatala namino'o atén, loti méd obo.b
7 Duru ba loti uil sowo-somong atany,
sóm puny so obo ara nu,
8 Wé sonang aalu du, sano'o nu.’c
9 Lahatala só sonang aalu ano'o nu wé, namino'o wói ahi'i-aweteng ei!”
10 No'ang wé, Yésus méd O nami ata'ai-alolo solo sang bang nu óm lomidi. Naab wé Yésus wu sununy awu du, sununy wu ta'any.
11 Yésus aboro wu bang, “Aanu so obo ara sahi'i-saweteng aang wé, obo beng méd du, bu'u-ta'au aang! 12 Obo di du'uny! Aanu só so loti ara sahi'i-saweteng, aang wé loti beng méd du, bu'u-ta'au!”d
Tuhan Yésus Ei wuntu-weceng méd ei kenewe ene
(Matius 19:13-15; Lukas 18:15-17)
13 Taping du mi, nami nuny so ei kenewe ara Yésus olap sang aang wé, abang Sa satang tameng ee, wuntu-weceng méd aring ei kenewe du ene. Bó, Yésus O nami ata'ai-alolo nami du ehapa.
14 Yésus dunu ahól duru wé, Ei So nami ata'ai-alolo e ari'ing wu bang, “Ei kenewe No lap ma du, yi mong edunu! Ehapa ei! Naim ba ei kenewe aning duru wé, Lahatala éi nami. 15 Yi wuma no'o-no'o! Aanu só óm ho'o Lahatala eng madang-apung madang mi, sununy uil óm Lahatala wuma wé, mong só wéde'e ei kenewe sowo kai-somong kai wuma du'uny. Du'uny dang he, sununy sano'o Lahatala éi nami saha.”e 16 No'ang wé, Yésus Ei ei kenewe nuny du awa'a ko'o aang wé, wu nu-nu Satang méd tameng aang wé, wuntu-weceng méd ene.
Nami kawasa óm Lahatala ara weceng sang so eme wuma
(Matius 19:16-30; Lukas 18:18-30)
17 Taping Yésus méd o nami ata'ai-alolo pa lami ano'o he, nami kawasa piir nu te'eng-te'eng ho'o ahól óm ma. Ei Yésus apung madang mi li'i aang wé, sa ta'any wu bang, “Niming tunggur mati-rei! Nóm aa tana pite'e wuma. Do'ony Niming. Na uil pnene tro'ony wé, du'uny ee na actno-no'o sorga lang Lahatala ara weceng so eme?”
18 Yésus wu aboro wu bang, “Naab éi wé aa No lowi, ‘mati-rei!’ Nami den mati-rei dang, Lahatala solo. 19 Aa ahól aang, Lahatala o prente turu mi sang wéd do mi wu bang,
‘Ha'ai nami amini ei;
Ha'ai bu'u-ta'au ei;
Ha'ai na ta'au ei;
Ha'ai ba'a kaluwi o saksi ei;
Ha'ai nami adiming o na méd ei;
Du'uny didi yiwi-yiming wu aada ahól.”’f
20 Ei du wu aboro wu bang, “Actno'o, Niming tunggur! Móny na dei awolo ta, prente dopo so baarpi na ata'ai aang.”
21 Yésus óm ei du esaha aang wé, Sa wu bang, “Actno'o! Na eng nu dei. Wéd do aa aaboro sang oo kawasa towong du wail atépung. O seng méd, witi sang nami lahala e dlam. No'ang wé, aa ho'o ee ma Nata'ai. Mi nu mi, Lahatala tóny sorga mi kawasa beng méd eene.”
22 Ei Yésus am pa'a dopo ma'éhé he, óm mudi. Aang wé sa sóm kurung osaha mi saboro, o seel du sa kawasa empiri.
23 Aang wé, Yésus dunu sang-dunu ho'o, wé Sa nami ata'ai-alolo ar mating wu bang, “Aalepeng ee! Nami kawasa sorga lowa du, susu osaha!”
24 Yésus O mating pa'a dopo ma'éhé du, O nami ata'ai-alolo óm wu piri. Bó Yésus wói wu bang, “Aalepeng no'o-no'o! Oom Lahatala o nami so he, du susu osaha! Ha'ai tanut wu bang du welung, du'uny dang. 25 Ee nami kawasa sorga lang óhó wé, sano'o Lahatala o nami du, éi susu o ara hama du, unta mait nu, batung bói lolo wa, só wóu lomidi saha aning.”
26 Yésus o mating pa'a du, puny sununy baarpi óm ano'o mong wu piri ta. Wé sununy mi satana wu bang, “Actno'o, o abulu du'uny he, aanu só pa il-luling méd no'o?”
27 Yésus sununy wu piir nu-nu edunu, aang wé wu bang, “Wa namino'o éi alolo he, actno'o saij dang. Bó ha'ai wu sibing ere'eng: Ma Lahatala éi alolo he, na leleng air nu mi an no'o!”
28 Aang wé, Pétrus mating wu bang, “Niming. Niring óny do, ni nina leleng air nu méd meng oh'ang, aang wé ma Niming ata'ai. Bó ni naab méd?”
29-30 Yésus wu bang, “Na yiara mating wuma du do'ony: Aanu só Na ta'ai aang wé, lami sowo-somong méd meng, só ei matu só ei di'i, só ei nuny, só dil-só butu, só kreseng méd só bang óm méd meng aang wé, sang mong taur-taru mi Lahatala o Tut No'o wu nami ar mating, sa pa o wu holong méd du, sang mi rat nu. Leleng air nu ba sa méd meng aang óny do, sa pa so na o wu aboro méd mi towong. Sa Na ta'ai aring du éile wé, naim bihi-pal. Bó taping pli'i-mati óny do sóhóny-nani he, sa weceng Lahatala ara ahi'i dang. O wu aboro ba du! 31 Wuma ee! Aanu só sano'o mati-sano'o lawén, Lahatala éi tanut ata'ai he, mi nu mi, sa so mi ka'ai-lama. Bó aanu só tanut sa ka'ai-lama, Lahatala éi tanut ata'ai he, mi nu mi, ei só sano'o nami mati.”g
Tuhan Yésus Ei So mini wu mating o mi towo mi
(Matius 20:17-19; Lukas 18:31-34)
32 Taping du mi du, Yésus nuny Yerusalem laang. Yésus mi so turu. O nami ata'ai-alolo piir air nu waling aalu méd nami beng nuny di, sununy Ata'ai. Naab wé Yésus wu mating wa taping ba mi ali aang du, sununy dei wuma hé, wu bang, nami Yerusalem mi Amini wuma. Duru éile wé, sununy óm wu piri méd wu bróic. Aang wé, Yésus So nami ata'ai-alolo solo o lowi no'ang wé, ar mating naab wé pa nami Yerusalem mi pnene ma O hadana du, Sa wu So nami ata'ai-alolo ar mating. 33 Sa mating wu bang, “Yi baarpi aalepeng ee! Wéd do pi baarpi Yerusalem laang. Naring óny do, Actno'o Namino'o Abulu. Bó móny doop mi du, nami Naring wail méd agama Yahudi o kpal éi kpal nuny méd agama o tunggur nuny ene. Aang wé, sununy Naring hukung Namini. Sununy Naring wewe méd nami Lahatala apung ahól dang ene. 34 Aang wé, sununy Ne biti Nano'o mala. Sununy parang No pahur. Sununy Naring wrahang. No'ang wé, sununy Na mini. Actno'o, Na actno'o mini. Bó mi taring aalu he, Na wói No weceng.”h
Yakobus méd Yohanis bomo mati wu Abang
(Matius 20:20-28)
35 No'o he, Yakobus méd Yohanis, Sabadius o ei nuny, Yésus lap ho'o. Sununy Yésus abang wu bang, “Niming Tunggur! Nióm na nu wuma.”
36 Yésus sununy atana wu bang, “Yióm naab wuma?”
37 Sununy aboro wu bang, “Do'ony Niming! Sang taping nu mi, Aa perente puny lele-madala aang he, ni aabang Aa niring méd nimihing, nu wa Aatang tain le mi, nu ma Aatang wé'éng le mi, du'uny ee ni perente puny.”
38 Yésus wu aboro wu bang, “Yinang aalu óny do naab wé yi wu bang du, yi pahang dang. Naring óny do, pa susu-ma'ala towong ahól. Wé tro'ony? Yiéi yióm he, yi pa kuwa'a susu-ma'ala witi-wana sang yiowu mini mong só wéde'e Naring du'uny, me nani?”i
39 Sununy wu aboro wu bang, “Ni pnene no'o, Niming!”
Yésus wói sununy éi aboro wu bang, “Actno'o, yiring di pa susu-ma'ala witi-wana mong só wéde'e Naring aning. 40 Bó, aanu só pa Natang tain le mi mihi méd Natang wé'éng le mi mihi du, Nóu wu awata dang. Du Lahatala só wu awata. Aanu só leng doop mi mihi du, Ei wu awata téning aang.”
41 Taping nami ata'ai-alolo beng naab wé Yakobus méd Yohanis wu Yésus abang du ma'éhé, sununy ari'ing osaha. 42 Wé Yésus sununy baarpi o lowi aang wé wu bang, “Do'ony! Yi baarpi ahól aang ee? Naim mati ba perente puny du, so sereng ta tóhó-ta lami no'o, sang o sereng labér saha. Méd bang-pli'i o naim ba Lahatala apung ahól dang du, o kpal buni-lóhóny óm mi so sereng prente, duru ba o sereng solong atele di ta saha. 43 Bó yiring du, pnene du'uny ei! Yiring du, aanu só óm mati wuma he, sa uil mong só wéde'e nami o mangsi naim beng o balente.j 44 Di aanu só óm kpal puny wuma he, sa uil pnene mong só wéde'e mangsi aning.k 45 Wéde'e Naring do, Actno'o Namino'o Abulu, ho'o du'uny ee nami Néita-Nemuling du'uny dang, bó Na ho'o ee nami towong éita-emuling. Na ho'o No weceng baarpi alorong puny nami towong o saha-ahala hawóhó.”
Tuhan Yésus Ei nami eng saha ano'o tabiring
(Matius 20:29-34; Lukas 18:35-43)
46 Yésus méd O nami ata'ai-alolo, wóiméd nami towong saha beng ara sang kota Yeriko mi. Taping sununy wói so lami du hamowo he, nami eng saha nu se adi'i mi mihi na bang hé. Aning Bartimeus, Timeus o ei. 47 Taping sa ma'éhé wu bang, nami du lolo wa du, Yésus Nasaret hining o nami wé, ei wu aabi'ing lowi-yid wu bang, “Yésus, Daut o tóhó-o pó'ó óó! Ni Aadanang lu'ung aang Niming! Óóm ne saha wé!”
48 O lowi-yid du naim ma'éhé wé, nami nuny ehapa wu bang, “Heh! Poro!”
Bó, ei lowi-yid mong wu aabi'ing ta, wu bang, “Yésus! Daut o tóhó-o pó'ó óó! Óóm ne saha wé!”
49 Duru wé, Yésus se paling. Wé Sa wu bang, “Yi ei du ara do lolo ma!”
Aang wé, nami o lap wa ar mating wu bang, “Aa poor ee. Tunggur oo lowi hé. Aa ha'ai bróic ei, ma!”
50 Mating pa'a du ma'éhé, Bartimeus so nowong hing wewe ee, hara'any-hara'any tóóh aang wé sang Yésus ahól.
51 Yésus atana wu bang, “Aa naab wé óóm ma?”
Ei eng saha du, wu aboro wu bang, “Niming! Na Aabang ee, na dunu na ahól.”
52 Yésus ar mating wu bang, “O seel du, aa Naring percaya wu bang, Na aano'o tabiring no'o wé, wéd do aa tabiring méd! Sono'o aaboro!”
Wé Bartimeus eng no'ang. No'ang wé ei naim beng ara, Yésus ara sang atany.