2 Wéd talang du óh he, Yésus Ei Pétrus, Yakobus, méd Yohanis eneai, ara hama-hama bini lawén nu hili, bini du nami den ara du mi dang. Taping sununy sang bini ta, sununy dunu he Yésus wói beng aang. 3 O wene di wele méd madaal aang. Óny pli'i-mati ta du, na den wele empiri Yésus o wene ara hama dang. 4 Mi se'udu he, sununy dunu Yésus ee Élia méd Musa ara sara mating hé.

5-6 Pétrus nuny bróic wu samini. Wé Pétrus óm mong wu piir ta, sang ei mong tani o mating he. Aang wé, ei Yésus ar mating wu bang, “Niming! óny do mi du, tóm mi no'o osaha ee! Wé mi no'o le he, ni duup towo atén, nu Eene, nu méd Musa ene, nu méd Élia ene.”

7 No'ang wé, low tawé'éng hele sununy balói piri. Aang wé, mating pa'a low tawé'éng óm lo ho'o sununy ma'éhé wu bang, “Aalepeng, óó! Yésus óny do, No Ei, Na No na esaha. Éi wé, yi ma'éhé no'o-no'o!”^a

8 Taping Pétrus nuny ama du ma'éhé, sununy dunu sang ho'o, ara se'udu he sununy wói nami beng ahól dang aang. Yésus solo ahai du mi.

9 No'ang wé, Yésus méd o nami ata'ai-alolo piri towo ara tóny bini ta hele. Aang wé, Yésus sununy ehapa wu bang, “Naab wé wéde'e yi edunu du, yi ha'ai wu nami beng ara mating ei. Naring do, Actno'o Namino'o Abulu. Na uil mini wé. Só bó, Na pa No weceng aang, du'uny aang wé yi sang wu nami ara mating no'o.”

10 Sununy Yésus o mating du wu apuny dumi, wé sununy nami ara mating dang. Bó sonang towo mi satana wu bang, “O tanut naab wé, Sa wu bang, ‘Sa pa mini bó pa wói weceng seleng lolo’ du? Tro'ony ee?”

11 Aang wé, sununy Yésus atana wu bang, “Agama o tunggur nuny du mating wu bang, Élia uil soturu ho'ang wé, Kristus ho'o. Bó Niming Éi ata'ai he, tro'ony?”^b

12 Yésus wu aboro wu bang, “Actno'o só. Élia uil soturu ho'o se ebulu duling méd Kristus ene, aring nami du Lahatala Ei turu mi wu tuub aang. Bó tro'ony? Naab wé sununy hulu du yi pahang dei só, Actno'o Namino'o Abulu éi ara hama du? Lahatala Am Pa'a Madulung mi, nami huul aang só, wu bang Sa ho'ang he, nami ano'o susu, sang sununy óm amini wuma. 13 Bó yi uil aalepeng no'o-no'o wé óó! Élia du actno'o ho'ang. Bó nami ano'o susu ano'o ma'ala sununy éi ining ata'ai. Du'uny di, naab wé baap-bali nuny turu mi hulu du, ara haam aang.”

14 Taping Yésus méd O nami ata'ai-alolo piir toow du, sang nami ata'ai-alolo beng wói ara talói, sununy dunu naim towong talói hé ahól. Naim towong nuny du ho'o Yésus O nami ata'ai-alolo agama o tunggur ara sata mi hé, edunu. 15 Taping naim towong dunu Yésus ahól, sununy so mi se'udu, sununy éi óm he, Yésus dei tóny bini lawén ta. Aang wé, sununy te'eng wa Yésus O lap wa.

16 Wé, Yésus sununy atana wu bang, “Yi naab wé óny do mi wu yiaata mi hé?”

17 Nami piir nu ma wu bang, “Niming, Aa aalepeng wé! Na no ei ka'ai loti ara ho'o, na aabang Aa ano'o il. Ei ma'au mating saha, seteng tamang du éi. 18 Taping seteng ei lang aang he, ei ei ka'ai óny do, puny wa'ai pal. Aang wé, ei ka'ai du ata wara-wara hele ata wu'utulu, méd ei saweheng yil. Aang wé, o bo'o paluhu mong wéde'e ti aning. Na Oo nami aata'ai-aalolo abang seteng du alolo aang só bó sununy pnene saha.”

19 Ma'éhé du'uny du, Yésus sununy e taba'a wu bang, “He! Yiring óny do, pi wu bang saha! Na yi aawu-yiatang ta'ana du mi lami lol aang bó, yi tanut mi muju dang só. Méd yi wu actno'o Naring percaya dang! Na uil No ari'ing du, atu'ui wa yi aara hama sang taping taru mi wé? Ei ka'ai du ara du lool ma!” 20 Wé, nami ei ka'ai du awoho ara Yésus olap wa. Bó, taping seteng dunu Yésus ahól aang wé, seteng ei ka'ai du puny wa'ai pal, wé ei ka'ai wa'ai du ta laolo sang ho'o didi ata wara-wara ata wu'utulu.

21 Aang wé, Yésus ei ka'ai omong du atana wu bang, “Oo ei ka'ai óny do, na du etana lu'ung aang so?”

Ei ka'ai omong du éi aboro wu bang, “Dei ka'ai ta ano'o. 22 Seteng du óm ei ka'ai óny do amini wuma du, lu'ung aang só. No ei ka'ai du ei méd aawai mi wewe mi lami lolo, si di mi abub. Wé Niming niéita wé! No'o he, Niming Aa niring wu karang ma ei ka'ai óny do ano'o il wé.”

23 Yésus ei aboro wu bang, “Naab éi wé aa wu bang, ‘No'o he’? Naring do, na leleng air nu pnene no'o bó, aasala nami soturu Naring percaya wé!”

24 Aang wé, ei loti tuma'a da ahany, o óm mi sa Yésus éi aboro wu bang, “Niming! Na Aaring percaya aang só. Bó néita no percaya du, mong ano'o kuwa'a!”

25 Aring sél du, Yésus dunu naim towong ho'o leng du mi wu lubung-wu la'olo he aang. Aang wé, Sa seteng prente wu bang, “He! Seteng saha! Aa sono'o ei ka'ai mi hele sang, ee sa na ma'éhé, wói mating no'o. Aa ha'ai wói aaboro ei ka'ai óny do tamang ei!”

26 Yésus am pa'a du ma'éhé he, seteng du wu aabi'ing lowi-yid. Ei ei ka'ai du ano'o olo, tabibing aa'any mong madang-madang momong aang wé, hele ei ka'ai méd atany. Wé ei ka'ai du, tasibing olo mong só wéde'e min aang aning. Sang nami du mi du, mi sara mating wu bang, “Wuu! Ei ka'ai min aang!”

27 Bó, Yésus ei ka'ai du atang apuny aang wé éi ta awóhó tóhó. Wé ei setele tóhó.

28 No'ang wé, Yésus méd O nami ata'ai-alolo air leng du meng aang wé, wa bang nu óm lomidi. Nami ata'ai-alolo du mi, Yésus atana wu bang, “Niming! Ee tro'ony wé, wéde'e ni seteng du alolo saha?”

29 Aang wé, Yésus sununy ar mating wu bang, “Aalepeng no'o-no'o ee! Seteng nuny du actno'o saha. Wé aa'omi Lahatala abang yiéta du, yi mi pnene dang he, seteng dopo'ony du, yi alool saha.”

30 No'o he, Yésus méd O nami ata'ai-alolo air leng du meng aang wé, sununy móny propensi Galelea lool sang. Taping du mi du, Yésus óm du, Sa ara du mi du, nami den wói ta ahól ei, 31 du'uny ee sa, So nami ata'ai-alolo wé solo awu. Sa sununy ar mating wu bang, “Lu'ung dang he, nami Naring wai méd naim beng ene. Aang wé, nami Na mini, Actno'o Namino'o Abulu do. Actno'o Na mini bó, wéd o mi aalu mi he, Na wói No weceng.”^c

32 Yésus wu bang du'uny só bó, O nami ata'ai-alolo tanut mi muuj dang. Sununy bróic wé, Yésus mating dopo wu bang du o tamuju naba, wu Atana dang.

33 Dopo'ony no'o he, Yésus méd O nami ata'ai-alolo ara sang Kapernaum mi. Taping sununy bang óm lomidi, Yésus So nami ata'ai-alolo atana, wu bang, “Wéde'e se haam mi, yi naab wé wu yi aata mi?”

34 Sununy den wu aboro dang, o seel du sununy aanu so so mi mati lawén du, wu sata mi aang.^d

35 Aang wé, Yésus sununy awu wu bang, “Aanu só sano'o mati óm wuma he, éi weceng du sa uil mong wéde'e nami lama aning, du'uny wé sa naim baarpi éita-emuling.”^e

36 Aang wé Yésus Ei, ei ka'ai nu du mi du awóhó no'ang wé, Sa saboro wa naim towong ani hama lowa tóhó. Aang wé, Sa mating wu bang, 37 “Aanu só Nata'ai ee, nami ka'ai lama éita-emuling, o ara hama du ei ka'ai óny do'ony, o tamuju he, aring nami du Naring wé Néita-Nemuling hé. Wói he sa wa Niming ba Naring tahowo óny pli'i-mati ta ho'o du, éita-emuling.”^f

38 No'o he, Yésus O nami ata'ai-alolo nu aning Yohanis, ara mating wu bang, “Niming! Mi nu mi, ni dunu nami nu Aaning puny seteng alolo. Bó, ni ei du ehapa, o seel du téi nami dang.”

39 Bó, Yésus wu aboro wu bang, “He! Yi ha'ai ehapa ei. Aanu só Naning puny aang wé, na empiri ar leng he, sa Naning asahany dang. 40 Ei taar saha dang he, ei du téi nami só.^g 41 Wé, wuma no'o-no'o, óó! Pa nami den ahól wu bang, yiring du Kristus ata'ai aang wé yiemuling he, Timing Lahatala aring nami du o maruki wu sibing dang. Masi ei si óhó solo wé tu'ei nu yi ene na di, Timing Lahatala ei du wu sibing dang.”^h

42 Wói wu ata'ai he, Yésus sununy ar mating wu bang, “Nami den ei kenewe piir nu ano'o se ahala lolo he, sang o we'ele ei ka'ai du wói Naring percaya dang he, wuma no'o-no'o óó! Mi no'o le, aring nami du wui mati nu wé punyⁱ awa wu hél aang wé, méd lewe-la'ana mi wewe.

43 Aa aatang puny saha-ahala pnene he, aatang du mong tate'e wewe! Mi no'o le he, aatang den le wé puny sorga lang, ee aatang so aalu bó, nami aaring méd neraka aawai bang mi wewe.^j 44 [Neraka du, actno'o susu-ma'ala o leng. O aawai du wói miin dang. Méd yip towong óm mi di, na ano'o mong boni mong maning wói wu ahi'i dang.]^k 45 Aa ee'eu puny saha-ahala pnene he, ee'eu du mong tate'e wewe. Mi no'o le, ee'eu den le wé puny sorga lang, ee ee'eu so aalu bó, nami aaring méd neraka aawai bang mi wewe. 46 [Neraka du, actno'o susu-ma'ala o leng. O aawai du wói miin dang. Méd yip towong óm mi di na ano'o mong boni mong maning wói wu ahi'i dang.]^l 47 Aa eeng pa'a puny ahala pnene he, eeng pa'a du mong wó'ó wewe! Mi no'o le, eeng pa'a nu puny sorga lang, ee eeng pa'a so aalu bó, nami aaring méd neraka aawai bang mi wewe.^m

49 Naab wé, Na wu yiaawu-yiatang ta'ana óny do, actno'o tarowi. Wé aanu só óm Nata'ai wuma he, sa uil atu'ui wu ahi'i dang, mong só wéde'e naim binanta o hiri, tang-hiri méd ta aang wé abono, du'uny ee tró'óng lu'ung di, sa saha dang.

50 Tang-hiri du, no'o. Pi puny nameje ano'o aatolo éi. Bó tang-hiri du sa wói aatolo dang aang he, o no'o tro'ony? Pi méd wewe. Yiring di uil mong só wéde'e tang-hiri du'uny, weceng mi yiring wu karang wa naim baarpi ara hama.^o

Wé, mi yiaata mi óny aanu só so mi mati, aanu só so mi lama du yi sono'o!”