Sin na'besan neu Uisneno anbi sonaf neno tunan
4
Mansian Batuur-Batuur naan na'uab anrair In haan manbasan neun jema'at hiut ein on naan ate, Uisneno nakrira' kau rasi bian anteni'. Nok askeken ate, au 'iit eon es masoit et sonaf neno tunan. Rarit au 'neen tuaf naan re' in haan ee on re' to'is, na'uab am nak, “Amsae uum meu ia, he au u'itab ko, are' saa'-saa' re' of he njair.”2 Oras naan, Uisneno In Asmaan ee nait neik kau 'sae 'eu sonaf neno tunan. Nok askeken ate, au 'iit a'toko prenat, ma nmui' tuaf antoko nbi na. 3 In masnaaf mamate' ma me'e, on re' faut arimat re' ma'osa', re' sin nteek ee nak, yaspis ma sardius. Anmui' enous es, anfuun naan a'toko prenat naan. In asnaaf ee mamate' on re' faut arimat samrut.a 4 Anbi bare naan, anmu'i 'toko prenat mana' bo' nua mhaa re' aan'-aan' ein, sin nfuun naan a'toko' naan. Anmui' naan amnasit tuaf bo' nua mhaa ntokon nbin a'took ein naan. Sin aar sin anpaken paek muti', ma na'soeb ein a'sobe prenat re' anmoo' je na'ko noin-moro'. 5 Anmui' rimat re' npiin anpoin na'ko 'toko prenat re' abit atnaan ee, ma 'roots ee 'puun ee nanoon. Anmui' obor hiut re' anpinan npoin na'kon a'toko prenat naan in matan. Sin aar sin re' naan, nahuum on re' Uisneno In Asmaan ee re' nmui' masaf hiut.b 6 Anbi 'toko prenat naan in matan, au 'iit on re' oe tasi. Oe tasi naan kniun ii on re' ninu.
Rarit au 'iit mu'it haa re' ma'tain bes-besin, nfuun naan a'toko' naan. Sin aok ein naheun nok mataf. Sin re' naan, Uisneno In mui't ein re' ntuthae Je.c
7 Mu'it ahuunt ee, in huumn ee, on re' meo'-roi' singa. No nuan ii, on re' bijae keso. No teun ii, on re' mansian. Ma no haan ii on re' kor-garuda natpeen.d e 8 Mui' haa' ein naan, es-es ate, maninif nee. Anbi niinf ein naan koti-mnaan, naheun nok mataf. Fai-manas sin nsiin piut-piut am nak,
“Hai mbo'is mi'naeb Uisneno!
Hai maikas ma mi'ratan Uisneno In kanan!
Uisneno naan, akniun ii kah een!
Uisneno naan, In kuasan ma'tain besi.
Uisneno nbi nain naa, na'ko un-unu'.
Uisneno nbi ia, oras ma eti ia.
Ma Uisneno re' tar antea nabar-baar.”f
9 Nok siit on re' naan, sin nsiin ma nbo'is Uisneno, ma nasaeb ein makasi neu Ne, natuin In ntoko nbi 'toko prenat, ma In re' nbi nain ia piut-piut tar antea nabar-baar. Oras sin nsiin, 10 amnasit tuaf bo' nua mhaa' ein naan anri'tuun nbin Uisneno In human ma In matan. Ma Uisneno antoko nbi 'toko prenat. Sin nsee' nain sin a'sobe preent ein, rarit sin natunu' sin nbi In a'toko prenat naan in matan, ma na'besan neu Ne, re' nabar-baar Kuun. Rarit sin npures ma nbo'is Uisneno mnak,
11 “Koi, Uisneno!
Hai mbo'is ma mi'naeb Uisneno!
Hai maikas ma mi'ratan Uisneno Ho kanam.
Uisneno Ko, hai Usi'.
Uisneno Ko, hai Uisneon goa!
Uisneno kuun ro es ansium ma ntoup hai siit pures-bo'is.
Uisneno kuun ro es ansium ma ntoup hai rais hormaat.
Natuin Uisneno kuun ro es akuaas re'uf.
Ma Uisneno kuun ro es ma'tain isat.
Uisneno kuun es re' anmoe' ma npakae are' kanan saa'-saa' ii oke'.
Uisneno kuun es re' namonib ma natorob are' saa'-saa' ii oke'.
Are' saa'-saa' re' ia,
anjarin nrarin, natuin Uisneno nmoe' ma npakae sin.
Are' saa'-saa' re' anmonin,
masnasa' natuin Uisneno kuun es annona' ma nfee.”