2 Amneen mirek-reko'! Au re' ia, nai' Paulus kau! Au es re' a'uab re' ia! Karu hi mtoup a'heri' he mituin atoin Yahudi sin atoran naan ate, Kristus In a'maten he nsoi nafetin kit naan, ka ma'upan fa gwen. 3 Karu tuaf antoup a'heri', in ro he nroi ma nasaah antein atoorn ein ok-oke' msa'. Hi mimnau, ai' kaah? Unu' fe'e te, au utoon 'ain ki. 4 Tuaf re' anroim he npaek atoran he nmoe' Uisneno he ntoup gwe, in nbetis in tuan ee nok Kristus. Nok ranan naan, in ntorak nain Uisneno In nekan arekot. 5 Mes Uisneno In Asmaan Akninu', re' anfei ranan he hit tpirsai Yesus Kristus. Es naan ate, hit tpa-pao tak, Uisneno of anmarak kit nak, hit atoin amneot. 6 Maski atoin a'heri', ai' kaah, naan ka pentiing fa. Mes re' pentiing ii es re' tuaf apirsait neu Kristus, ma anneek tuaf bian sin.

7 Unu' fe', hi mmoni mrair mituin raan reko. Mes oras ia, sekau nputa-kriu nrair ki, tar antea hi ka mituin fa ranan naan antein? 8 Noni' re' anputa-kriu ki ma hi mneen ee naan, ka neem fa na'ko Uisneno. Te kaah, In re' naan es re' no'en ma nhaman ki he mjair Iin na. 9 Saa' re' sin nanoni' sin naan, anmurai uab aan'-aan' aah, mes a'roo-'roo te, nareu' nain hi teenb ein naan. Nahuum on re' raur teif re' anseor gwe nok uut am oe he nmo'en utunu'. Ka 'roo fa te, raur teif naan, anmoe' uu masero' naan ansae oke'.^a 10 Natuin hit tjari trair mese' tok hit Usi' Yesus Kristus, es naan ate, au 'tebes 'ak, In of anmoe' ki mpirsai mfain meu saa' re' au unoni' 'ain ki sin. Ma Uisneno kuun of anhukun sekau-sekau re' nareu' hi rais pirsait.

11 On nai, aok-bian aar ki! Karu au unoni' 'ak, atoni' ro he napeni 'heri' te, ro batuur au ka upein fa ha'mu'it on re' oras ia. Ma atoin Yahudis sin ka ntorak nain fa au noni' sin anmatoom nok Nai' Yesus In a'maten anbi hau nehe naan. 12 Mes tuaf re' antaka'nanab ki anmatoom nok rais ma'heri' naan, maut he sin kuuk anheir nain sin a'maek ein ok-oke'.

13 Aok-bian aar ki! Uisneno nafetin anrair ki, he hi kais ammoni mmafuut mok atoran rais pirsait ii in romin. Mes kais mitenab mak, of oni' hi mipein fetin amrair mi'ko hi 'moinm ein sin roimk ein. Batuurn ii, hi ro he mmaneek, ma ammatuthaen es nok es, on re' ate antuthae in usin. 14 Anbi Suur Akninu' Uisneno matu'i mnak, “Ho ro he mneek tuaf bian sin, nahuum on re' ho mneek ho tuam aan kuum.” Karu hi suma mmoe' mituin atoran ia mees ahaa te, hi mmoe' mituin amrair atoin Yahudis sin atoran in sarit sin ok-oke'.^b 15 Mes karu hi mmanau-manan es nok es, ma mmabaan es nok es ate, amkius kiim! Ka 'roo fa gwen antein, hi of mireu' main hi 'moin ein kiim.

16 Au sairt ii on nai: karu hi mmoin mituin Uisneno In Asmaan ee In romin, hi ka mituin fa mansian ii in roimn antein. 17 Mansian ii in roimn ii, ka natuin fa Asmaan Akniun ii romin. Ma Asmaan Akniun ii In romin ka natuin fa mansian ii in romin. Sin nua sin nasurin. Onaim hi kais ammo'e mtein mituin hi roim ein naan kiim.^c 18 Mes karu Uisneno In Asmaan ee na'naa' ki, hi ka mmafuut fa gwen mok atoorn ein.

19 Tuaf-tuaf re' anmoe' natuin mansian ii in romin naan, on re': tuaf re' anmakoin nok tuaf re' ka in moen ja fa ai' ka in fee ja fa, tuaf re' in teenb ee re'uf, re' ka namaeb nahiin jon fa, 20 re' anfua nitu ma narauna', re' anmamusun, anmasau feef, neek maufinu, amaheket, namnau naan ahaa in tuan, afuarutus, amoe' taisibu, 21 amantinus, amauf raru ma nmoe' fesat sona', ma nasaan tuaf bian sin. Unu' fe', au umnaub 'iit 'ak, tuaf-tuaf re' anmoe' natuin rasin re' naan, sin re' naan ka bisa fa he njarin Uisneno Iin na.

22 Mes tuaf-tuaf re' anmoin natuin Uisneno In Asmaan ee In romin, Uisneno In Asmaan ee of anmoo' je njair tuaf re' amanekat, a'huma'moet, aroim rais rame', ansabaar nahiin in tuan, neek reko nok es, anroim he nturun ma nbaab es, annaa' naheran in rais manba'an, 23 reko nok too mfaun, ma npanat nahiin in tuan ee rek-reko. Ka tiit fa atoran mese' re' antaar nain rasin re' ia. 24 Tuaf-tuaf re' antaam anjair Yesus Kristus Iin na gwen, in ka natuin fa mansian ii in roimn antein. Romif he nmoe' maufinu sin, sin makuus ein mates et hau nehe nok Nai' Yesus. 25 Onaim karu Uisneno In Asmaan ee nfee kit a'moin fe'u nrari te, hit ro he tmoe' on naan piut, tatuin In romin. 26 Etun hit kais atromi haa re' he nhormaat kit, kais tasuir es nok es, ma kais atmoe' neek re'uf attein.