Uisneno antoup kit, natuin hit tpirsai teu Yesus Kristus
3
Atoin Galatias sin! Unu' te, au es 'eikn ok utoon a'bi hi maatm ein anmatoom nok Yesus Kristus In a'maten anbi hau nehe. Mes oras ia, tuaf neit napoi nrair ki. Hi moonm ein ii! 2 Au suma he utaan ki rasi piis es. Hi mtoup maan Uisneno In Asmaan ee natuin hi mmoe' mituin atoran rais pirsait? Kaah fa, tua! In Asmanan naan, neman ki, natuin hi mpirsai Rais Reko re' hi mneen ma mitniin amrair je naan. 3 Onaim nansaa' am es hi mmoon re'-re'uf on naan? Unu' te, hi mmoin mituin Asmaan Akniun ii In romin. Mes oras ia, hi mkoit ma mmoe' mituin mansian ii in romin. 4 Oras hi fe' ammurai mpirsai meu Kristus, hi mipein ha'mu'it kou'-ko'u. Kais-kaisa' rasin naan anjarin parsuum aah. (Te kaah, atpirsai teu Kristus, naan ka bisa fa he parsuum aah.) 5 Oras Uisneno nfee In Asmaan ee, ma nakrira' rais sanmakat huma'-huma' anbi hi humam ma hi matam, hi sonam ma hi tnanam, hi mitenab mak In nmoe' on naan, natuin hi mituin atoran rais pirsait? Kaah fa, tua! In nmoe' on naan, natuin hi mpirsai Rais Reko re' hi mneen ma mitniin amrair je.6 Mimnau atoin Yahudis sin uu'k ein, es re' ka'o Abraham. Suur Akninu' Uisneno antui mnak, “Natuin in npirsai neu Uisneno, etun Uisneno antoup gwe nok reko, ma nteek ee nak, atoin neek amneot.”a
7 Onaim hi ro he mihiin mirek-reko' rasi pisa' re' ia! Tuaf re' anpirsai on re' nai' Abraham, sin njarin Uisneno In tuaf ein re' batuur.b 8 Uisneno natoon nain anbi In Suur Akninu' am nak, In of antoup tuaf-tuaf na'ko uuf ma pah bian ma nteek ee nak, atoin neek amneot, karu sin anpirsai Je. Fin un-unu' fe'e te, In natoon nain Rais Reko neu ka'o Abraham nak, “Are' kanan uuf ma pah anbi pah-pinan ia, of napenin tetus-athoen natuin ko.”c 9 Natuin Uisneno In rais manba'an naan, etun In nfee tetus neu tuaf-tuaf sin re' anpirsai Je, nahuum on re' In nfee je neu nai' Abraham.
10 Tuaf re' natuin atoran rais pirsait he Uisneno antoup gwe, in ro he nroi ma nasaah ma'fena' atoorn ein naan ok-oke', nahuum on re' in napein kasat. Fin matu'i et Suur Akninu' Uisneno nak, “Tuaf re' ka natuin fa piut-piut atoran rais pirsait ii namnuut, in napein kasat!”d 11 Mes batuur een, Uisneno ka ntoup fa tuaf natuin in natuin atoran rais pirsait. Matu'i msa' nak, “Tuaf ro he npirsai Kau, na' Au 'toup gwe on re' atoin neek amneot, he in napeni 'monit re' batuur.”e
12 Karu atoni' nroim he natuin atoran rais pirsait ii in romin, in ro he nmoe' natuin sin aar sin tar namtiis ma namnuut. Fin Uisneno natoon nain anbi In Suur Akninu' mnak, “Tuaf re' anroim he nmoin natuin atoran, in of antaisibu haa nok atoorn ein.”f
13 Mes Kristus anbaen nafeek anrair he nafetin kit na'ko atoran rais pirsait re' anfuut kit. Unu' te, hit thae tmaet nok he troi ma tasaah ma'fena' atoran rais pirsait on re' tuaf re' napein kasat. Mes oras ia, Usif Yesus nait nain kasat naan na'ko kit. Matu'i et Suur Akninu' mnak, “Tuaf re' nakfiri' niis ne nbi hau, in napein kasat.”g 14 Oras Yesus Kristus anmaet he nsoi nafetin kit, tetus re' Uisneno anfee je neu ka'o Abraham, ansaun ma nnonos pah-pah bian sin amsa'. Nok ranan naan, are' apirsait ein neun Kristus bisa ntoup Uisneno In Asmanan re' In nba'an anrair Je naan.
Uisneno nnaa' naher-heran In rais manba'an
15 Aok-bian aar ki! Oras ia au he 'paek 'tope' na'ko hit i'monik ansuun oras. Karu anmui' tuaf antui naan surat warisan, rarit in nteken in kanan anbi surat naan, surat naan maheti' nrair. Tua sona' ka bisa fa he nkaibata' surat naan in afan, ma ka bisa fa he ntui ma nruun saa'-saa' anbi naan. 16 On naan amsa', oras Uisneno nahake' rais manba'an nok nai' Abraham ma in sufan-ka'un sin. Uisneno ka na'uab fa nak, “Au uhake' rais manba'an ia 'ok ho sufam-kau'm ein”, natuin In ka nahake' fa rais manba'an naan neu too mfaun. Mes In suma nahake' rais manba'an naan neu tuaf mese', es re' Kristus, re' nai' Abraham in sufan.h 17 Au sairt ii on nai: Uisneno nahake' rais manba'an nahuun nok nai' Abraham. Rarit toon natun haa mbo' teun on naan ate, In nasanut atoran rais pirsait neu atoin Yahudis sin, nanete npeo' ka'o Musa. Maski on naan amsa', Uisneno ka nkaibata' fa In rais manba'an re' In nahake' nahuun ee jan.i 18 Uisneno ka nfee fa tetus neu nai' Abraham natuin in nmoe' natuin atoran. Mes In nfee tetus natuin In nahake' nain rais manba'an he nfee je neu nai' Abraham na'ko unu' nok ruum am parsuum. Naan on re' ri'aan es antoup pusaak na'ko in amaf. In ntoup natuin in amaf naan anba'an nain, ka nak in ntoup fa natuin in nmoe' natuin atoran.j
19 Oras ia, au he utaan 'ak on nai: karu Uisneno ntoup nai' Abraham natuin in npirsai, nansaa' am es Uisneno na'baba' ntein atoran rais pirsait nanete npeo' ka'o Musa? In na'baba' atoran rais pirsait sin he nanoni' mansian anmatoom nok sin sanat huma'-huma'. In sairt ii he mansian ii anmoin natuin atoorn ii in romin, tar antea nai' Abraham in sufan es anboor. Rarit oras sufa' naan, es re' Kristus, anboor ma neem anrair, atoran naan ka nperluu gwe fa gwen.
Oras Uisneno anfee atoran rais pirsait Yahudi, In ka nfee je fa langsung nain. Mes In npaek In ameput sonaf neno tunan, rarit sin neik je neem neu ka'o Musa in a'niman, na' ka'o Musa nfee je neu atoin Yahudis. Nok ranan naan, nai' Musa anjair nete-ranan neu Uisneno ma Iin na. 20 Mes oras Uisneno nahake' rais manba'an nok nai' Abraham, In ka npaek fa nete-ranan. In neikn On es re' nahake' rais manba'an naan. Es naan ate, hit tahiin tak, Uisneno In rais manba'an naan, ma'tani' nneis na'ko are' kanan atoran.
Atoran rais pirsait ii nanoni' mansian anmatoom nok in sanat huma'-huma'
21 Oras Uisneno nfee atoran rais pirsait neu ka'o Musa, naan nasuir nok In rais manba'an sin, ii oo? Kaah fa, tua! Karu nmui' atoran re' mansian ii bisa nmoe' natuin ee, he Uisneno antoup gwe, atoin Yahudis sin atoran bisa on naan. Te kaah, ka tiit tain fa atoran mese' re' mansian ii nmoe' natuin, he nhainiik Uisneno In nekan, he ntoup gwe nok reko. 22 Anbi Suur Akninu' Uisneno matu'i nak, are' kanan mansian ii mafutu' mates nok sanat huma'-huma'. Etun suma apirsait neu Yesus Kristus anmes-mees, re' bisa ntoup saa' re' Uisneno anba'an anrair je naan.
23 Oras Kristus ka nkoen On neem fa fe', hit atoin Yahudis mafutu' mates anbi atoorn ein tar antea ka bisa masefi' fa. Mes antea in oras, Uisneno nfei ranan he hit tapein fetin na'ko atoorn ein, karu hit tpirsai Kristus. 24-25 Onaim atoran rais pirsait ein naan, nahuum on re' atukus re' nanoni' kit rek-reko tar antea Kristus ankoen On neem. Onaim karu In neem anrari te, na' hit tpirsai Je, he tmoin rek-reko tok Uisneno. Onaim oras ia, hit ka tperluu fa atukus naan antein.
Atoin apirsait anjari nrair Kristus In nonot-asar
26 Oras ia, hi mjair Uisneno In aanh ein, natuin hi mpirsai Yesus Kristus. 27 Hi ar-arki re' amtoupu mrair srani' he mjair Iin na, mafutu' mates mok Ne. 28 Apirsait ein ok-oke' neun Kristus ka mabetis fa gwen. Onaim maski hi atoin Yahudis, ai' ka atoin Yahudis fa, ate ai' ka ate fa, bifee ai' atoni', are' mansian ii re' mafutu' anbi Kristus naan, huma' mese'.
29 Kristus naan, nai' Abraham in sufan re' Uisneno anba'an anrair Je na'ko unu'. Natuin hi mmafutu' amrair mok Kristus, es naan ate hi mjair nai' Abraham in sufan batuur. Nok ranan naan, hi bisa mtoup tetus re' Uisneno anba'an nain je neu nai' Abraham amsa'.k