Maski atoin Yahudis anmui' hak he ntoup pusaak na'ko Uisneno In rais manba'an, naan ka nsoi nafetin sin fa msa'
3
Karu on naan ate, atjair atoin Yahudis re' ma'heri' te, in upan saa'? Of oni' hi mitenab mak, atoin Yahudis napein ko'u nneis ma reko nneis, na'ko atoin ka Yahudis fa. Batuur, ai' kaah? 2 Batuur! Atjair atoin Yahudis, anmui' in upan anbi rasi mfaun. Esan re': ahunut, natuin Uisneno anfee mepu neu atoin Yahudis he nruun ma ntui ma mpanat narek-reko' In Kabin ma Prenat. 3 Onaim on mee? Of oni' hi mitenab mak, Uisneno ka bisa nmoe' natuin fa saa' re' In na'uab, natuin anmui' atoin Yahudis bian re' ka npirsai Je fa. Batuur, ai' kaah? 4 Ka neu fa, tua! Fin maski mansian ii ok-oke' abitan pah-pinan ia aputa-kriut ein, mes Uisneno kuun na'uab namneo ma namnoon piut! Mimnau, fin matu'i et Suur Akninu' anmatoom nok Uisneno In tuan am nak,“Anmui' tuaf re' nasaeb sanat am nak,
In ka nafeek fa rasi natai ma namnoon.
Mes sin of nahinin am nak,
saa' re' In na'uab ee naan, ro batuur on re' naan.
In ro n'iis ma niis,
natuin In ro tebes ma ka bisa fa he na'uab ansaan.”a
5 Mes karu hit tmo'e tsaan, rasi naan naruru' ma nakrira' ntein neu mansian ii ok-oke' mnak, saa' re' Uisneno nmoo' je naan, ro batuur on re' naan. Karu on naan, hit he tak saa'? He tak, Uisneno nhukun kit ka natai ma namnoon fa, ai'? (Fin anmui' tuaf bian na'uab on naan ate.) 6 Ka neu fa, tua! Uisneno ka nsaan fa karu In nhukun kit. Fin In nmui' hak he nhukun tuaf-tuaf re' anmo'e nsanan nbin pah-pinan ia.
7 Onaim karu au aputa-kriut, naan naruru' ma nakrira' mnak, Uisneno In hukun naan, batuur. Karu au ukrira' ma ururu' 'rair In pinan ma krahan on naan, nansaa' am es In naprikas au 'monik, rarit nafeek au rasi mnak, saa' re' au 'moo' je naan, ansaan? 8 Kais on naan, tua! Fin karu hi he mituin tenab on naan, hi mituin tuaf re' nak, “Maut he hit tmoe' maufinu amfaun antein, maut he rais reko na'baab ok amfaun amsa'!” Tuaf re' na'uab on re' naan, ro tebes napein hukun. Mes anmui' tuaf re' na'uab na're'uf au kanak nak, au unoni' tuaf-tuaf a'saan on naan.
Ka tiit fa tuaf es, re' neekn ee namneo ma namnoon, fin hit mansian ii atmo'e tsaan ok-oke'
9 Onaim on mee? Hi mitenab hit atoin Yahudis es re' reko nneis na'ko atoin ka Yahudis fa? Kaah fa, tua! Fin au ururu' ma ukrira' ki 'ak, ansuun tuaf ro nmo'e nsanan, maski in atoin Yahudis, ai' ka atoin Yahudis fa. 10 Fin matu'i et Uisneno In Suur Akninu' mnak,
“Ka nmui' fa tuaf re' nmoin namneo ma namnoon piut.
Ro tebes! Ka tiit tiit fa tuaf mese' msa'!
11 Ka nmui' fa tuaf re' nahiin batuur-batuur anmatoom nok Uisneno.
Ka tiit fa tuaf mese' msa' re' naim ranan he nahiin Uisneno.
12 Sin aar sin anbeon ma npenun nrarin na'kon sin a'moink ein re' namneon ma namnonon.
Rarit sin ka mapaek ein fa gwen.
Ka tiit fa tuaf re' naruru' ma nakrira' neek reko.
Ka tiit tiit fa mese' msa'!b
13 Sin uabk ein, ro foo punu',
on re' noup nitu re' atoni' nhain nafani'.
Sin feefk ein suma napoitan puta-kriu gwah.
Sin uabk ein re' npoin na'kon sin feefk ein,
on re' kaun aan in raso.c
14 Sin feefk ein suma nahini haa he naseuk ein,
ma na'uab na're'uf he nneek menab atoni'.
fin naan anpoin na'kon sin neek reu'f ein.d
15 Sin ka namtaun fa he nroor na'maet atoni'.
16 Sin nnaon neun bare mee-mee jah ate.
sin anmataisiub ein nbin naan,
ma nasusab atoni' nok rasi huma'-huma'.
17 Sin i'moink ein ka nmu'in fa rais mamut ma rame',
ma ka nmonin fa nok neek mamut.e
18 Sin ka bisa naran ma ntahan naan fa sin tuak ein,
natuin sin ka nmu'in fa neek amtaus a'kre'o neun Uisneno msa'.”f
19 Hit tahiin tak, Uisneno nfee In Atoran neu tuaf re' ro he nmoin natuin Atoorn ein naan. Nok ranan naan, sin ka nmu'in fa rasi 'sukif saa'-saa' antein. Of ansuun-suun tuaf anbi pah-pinan ia, ro he nbaisenun n'anin Uisneno, he In nafeek sin rasin am nak, sin ansanan, ai' kaah. 20 Es naan ate, ka tiit fa tuaf es, re' bisa na'uab am nak, “Uisneno nmarak kau mnak, atoin neek amne'o ma amnonot, natuin au 'moe' utuin In Atoorn ein ok-oke'.” Ka bisa fa, tua! Fin Uisneno In Atoran re' naruru' ma nakrira' mnak, hit ar-arkit atmo'e tsaan.g
Hit ro he tpirsai Usif Yesus fe', na' Uisneno nmarak kit nak hit neek amneot ma amnonot
21 Kais amkeuk anmatoom nok Uisneno In reon re' naruru' ma nakrira' ranan he hit bisa tareko tfain tok Ne. Batuurn ii, hit bisa tareko tfain tok Ne, mes ka natuin fa hit tmoe' tatuin In Atoran. Fin In Atoran naan, antui on naan, ma In mafefa kniun' ein un-unu' natonan anbi Uisneno In Suur Akninu' on naan amsa'. 22 Uisneno nmarak kit nak atoin neek amneot re' he tareko tfain tok Ne, oras hit tpirsai teu Yesus Kristus. In ka npiir fa humaf, fin In nmoe' on re' naan neu tuaf ein ok-oke' re' anpirsain neun Usif Yesus on naan.h
23 Fin are' mansian ii ok-oke' nmo'en sanat. Es naan ate, tuaf re' nsoba' he nareok on nok Uisneno, ka bisa ntean fa In tu'in re' mapina'-makraha'. 24 Maski on naan amsa', mes Uisneno kuun es re' naruru' ma nakrira' In nekan arekot, ma nafeek nak, hit ka tsaan fa gwen antein. In ntoup kit on naan, natuin Yesus Kristus ansoi nafetin naan kit na'ko hit sanat ma penu sin.
25-26 Uisneno naruru' ma nakrira' neu Usif Yesus he njair fua'-turu' re' natai nafani' kit ma nnoes nain hit sanat ma penu sin. Mes hit ro he tpirsai Je tak, In ntoup hit sapaaf anbi rais hukun. Onaim In n'opa' ma nasaik In naa', ma nmate nsenu' kit. Nok ranan naan, Uisneno naruru' ma nakrira' nak, saa' re' In nafeek ee naan, ro batuur. Unu' te, In naran ma nsabaar ma'tani', rarit In npiir he nnikan nain sanat ma penu re' atoni' nmo'e nrair sin. Mes karu In ka nhukun fa tuaf re' ansaan, In ka njair fa afeek rasi re' natai ma namnoon. Onaim In nfei ranan, maut he Yesus Kristus bisa nasaah hit atoin asanat hit hukun. Oras ia, In naruru' ma nakrira' neu mansian ii ok-oke' mnak, In nmoe' rais reko piut. Rarit tuaf-tuaf re' ansaan, re' anpirsai neu Nai' Yesus, In nafeek he nmarak sin, atoin neek amneot.
27 Onaim on mee? Of oni' hi mitenab hi bisa mifeef, natuin Uisneno ntoupu nrair ki, ai'? Ka bisa fa, tua! He naruru' ki Atoran es he hi mireok om mok Uisneno, oo? Hi mitenab of Uisneno ntoup ki natuin hi mmoe' rais reko, oo? Ka bisa fa, tua! Hit suma bisa taruru' Atoran re' nak, Uisneno ntoup kit natuin hit tpirsai Nai' Yesus. On re' naan, tua!
28 Es naan ate, oras ia hit tahiin on nai: atoni' bisa narekon nok Uisneno natuin sin npirsai Je, ka natuin fa sin nmo'en natuin In Atoran.
29 Au he utaan on nai: Uisneno suma antoupu haa atoin Yahudis, aa oo, ai' In ntoup bian amsa'? Batuur! In ntoup mansian ii ok-oke'!
30 Fin Uisneno, suma mees' aah. Ma suma nmui' ranan mees' aah he In ntoup kit mansian ii he bisa tareko tfain tok Ne. Es re', hit ro he tpirsai teu Kristus. Ranan re' naan, anfei je neu atoin Yahudis ma ka Yahudis fa msa'.i
31 Onaim au he utaan on nai: karu hit tpirsai Uisneno, re' naan annoes nain In Atoorn, aa oo? Kaah fa, tua! Re' batuurn ii, naan anmoe' Atoran naan saah.