Rakyat dong mangaku sala
10
Esra sambayang deng buka hati ko mangaku orang Isra'el dong pung sala. Dia sambayang deng aer mata malele. Ju dia tikam lutut ais matono sampe di tana di muka Tuhan pung Ruma Sambayang Pusat. Waktu dia ada sambayang bagitu, orang bam-banya mulai bakumpul makarumu ame sang dia. Dong tu, andia orang Isra'el pung laki-laki, parampuan, kici-bésar samua. Dong ju iko manangis deng hati susa talalu.2 Ais ju, Sekanya mulai ba'omong deng Esra. Sekanya tu, andia Yehiel pung ana, dari Elam pung turunan dong. Dia kasi tau bilang, “Bapa. Botong mangaku botong su langgar kotong pung Tuhan Allah pung parenta waktu botong kawin campor deng parampuan dari bangsa laen dong yang sonde kanál sang Tuhan dari ini tampa. Biar bagitu, ma sakarang kotong bangsa Isra'el masi bisa baharap sang Tuhan. 3 Jadi beta mau usul dia pung jalan kaluar bagini: kotong musti ika janji deng kotong pung Tuhan ko kasi pulang samua parampuan orang asing dong deng dong pung ana-ana. Botong mau bekin iko Tuhan pung parenta. Bapa Esra yang hak urus sang botong, ada kasi inga sang botong ko bekin iko bagitu. Deng orang laen dong yang taku deng gamatar sang Tuhan pung parenta dong kasi nasiat bagitu ju. 4 Bapa Esra bangun dolo! Kasi kuat bapa pung hati. Bapa musti barani kasi tunju jalan sang botong sakarang, te itu bapa pung tanggong-jawab bagitu. Ma bapa mau putus karmana, na, botong dukung bagitu ju.”
5 Dengar bagitu ju, Esra bangun badiri. Tarús dia minta ko orang dong sumpa kalo dong mau bekin iko samua yang Sekanya su usul tu. Jadi kapala agama dong pung bos-bos, orang suku Lewi, deng samua orang Isra'el dong angka sumpa bagitu.
6 Sumpa abis bagitu ju, Esra ondor dari Ruma Sambayang Pusat pung muka, ais itu malam dia pake satu kamar di Yohanan pung ruma. Dia tu, andia Elyasib pung ana. Di situ Esra puasa, sonde makan deng sonde minum aer ju. Te dia rasa talalu susa tagal orang yang pulang dari Babel dong ada langgar Tuhan pung atoran dong.
Rakyat bakumpul ko mau dengar Esra pung omong
7-8 Ais itu ju, orang Yahudi dong pung bos-bos dong kirim pasán di anteru tana Yahuda deng kota Yerusalem bilang, “Dengar bae-bae dolu! Bosong samua yang su pulang datang dari Babel musti bakumpul di kota Yerusalem dolu. Dia pung lusa, sapa sa yang sonde muncul datang, nanti kaná denda. Dia pung tana deng harta samua tacabut abis. Dia ju kaná usir dari samua orang yang su pulang dari Babel. Ini parenta ni, botong yang pegang parenta deng tua-tua adat dong yang bekin. Bagitu sa.”
9 Dia pung lusa tu, jato kaná di tanggal 19 Desember.a Samua orang dari suku Yahuda deng suku Benyamin su bakumpul di Yerusalem. Dong ada dudu di tana lapang di Tuhan pung Ruma Sambayang Pusat pung muka. Dong samua gamatar tagal ini parkara pung barát, deng tagal ada ujan ju. 10 Ais ju, Esra, yang jadi kapala agama, bangun badiri, ju kasi tau sang dong bilang, “Bagini: bosong su bekin sala deng langgar Tuhan Allah pung parenta, jadi Tuhan sonde bisa parcaya sang bosong lai. Te bosong su kawin campor deng parampuan dari bangsa laen yang sonde kanál sang Tuhan. Deng bagitu, bosong su bekin kotong bangsa Isra'el pung sala yang su mal'unuk batamba-batamba. 11 Dia pung jalan kaluar bagini: sakarang bosong musti buka hati ko mangaku bosong pung sala deng dosa sang TUHAN Allah, yang kotong pung nene-moyang dong sémba. Bosong musti bekin iko Dia pung mau. Dia su pili ame sang bosong ko jadi Dia pung orang dong, andia ko bosong musti jadi beda dari samua bangsa yang laen dong. Jadi, kasi pisa diri dari ini bangsa laen dong, deng dong pung parampuan ju.”
Rakyat dong tarima bae Esra pung omong
12 Samua orang yang ada bakumpul di situ manyao pake suara kuat bilang, “Batúl! Itu batúl! Botong musti bekin iko bapa pung omong bagitu. 13 Ma nanti dolo! Te botong sonde tahan badiri tarús di ujan bagini. Sonde mungkin botong bisa urus ini parkara deng capát. Te botong yang kawin campor deng bekin sala ni, ada banya orang. Satu-dua hari sa sonde cukup na! 14 Jadi botong mau usul bagini: biar botong pung bos-bos dong tenga di sini ko bagarák deng urus samua-samua kasi sang rakyat. Biar botong yang laen dong pulang kampong dolu. Nanti pange ame sang botong pake roster dari tiap kota. Ais ju botong yang su kawin campor deng parampuan bangsa laen dong, datang mangada sama-sama deng tua-tua adat deng tukang putus parkara dong dari tiap kota, iko dia pung waktu. Kalo botong bekin iko bagini, botong harap kotong pung Tuhan Allah pung mara sonde tapo'a di botong lai.”b
15 Dari samua orang yang bakumpul di situ, cuma Yonatan (andia Asahel pung ana), deng Yaseya (andia Tikwa pung ana) sonde mau tarima. Deng ada dua orang suku Lewi, andia Mesulan deng Sabetai, yang sokong sang dong.
16 Samua yang laen, yang su pulang dari Babel dong tarima bae ini rancana ni. Ais ju dong bekin iko bagitu. Andia ko Esra, yang jadi kapala agama tu, pili orang ko urus dong pung keluarga bésar sandiri-sandiri. Esra pili sang dong pake dong pung nama ju. Pili abis bagitu, ju dong mulai dudu pareksa ini parkara di tanggal 29 Desember.c 17 Tanggal 27 Maret taon muka,d dong su urus abis ini parkara so'al laki-laki orang Isra'el yang su kawin campor deng parampuan dari bangsa laen dong yang sonde kanál sang Tuhan.
Nama orang yang kawin campor dong
18-19 Kapala agama yang su kawin campor deng parampuan dari bangsa laen dong, ada angka sumpa bilang nanti dong kasi pulang sang dong pung bini. Ais dong satu-satu horo satu domba laki jadi korban ko Tuhan hapus buang dia pung sala. Itu kapala agama dong pung nama, andia:
Dari Yesua pung turunan, andia Yosadak pung ana, deng dia pung adik-kaka dong, yang kaná andia: Maaseya, Elieser, Yarib, deng Gedalya.
20 Dari Imer pung turunan: Hanani deng Sebaja.
21 Dari Harim pung turunan: Maaseya, Elia, Semaya, Yehiel deng Usia.
22 Dari Pasyur pung turunan: Elyoenai, Maaseya, Ismael Netanel, Yosabad deng Elasa.
23 Dari orang suku Lewi dong: Yosabad, Simei, Kelaya (yang dong pange bilang Kelita ju), Petahya, Yuda deng Elieser.
24 Tukang manyanyi yang kaná: Elyasib.
Dari tukang jaga pintu Ruma Sambayang Pusat yang kaná: Salum, Telum deng Uri.
25 Orang Isra'el yang laen dong yang kaná, andia:
Dari Paros pung turunan: Ramya, Yesia, Malkia, Miyamin, Eleasar, Malkia laene deng Benaya.
26 Dari Elam pung turunan: Matanya, Sakaria, Yehiel, Abdi, Yeremot deng Elia.
27 Dari Satu pung turunan: Elyoenai, Elyasib, Maanya, Yeremot, Sabad deng Asisa.
28 Dari Bebai pung turunan: Yohanan, Hananya, Sabai deng Altai.
29 Dari Bani pung turunan: Mesulam, Maluk, Adaya, Yasub, Seal deng Yeramot.
30 Dari Pahat-Moab pung turunan: Adna, Kelal, Benaya, Maaseya, Matania, Besaleel, Binui deng Manase.
31 Dari Harim satu lai pung turunan: Elieser, Yisia, Malkia, Semaya, Simeon, 32 Benyamin, Maluk deng Semarya.
33 Dari Hasum pung turunan: Matnai, Matata, Sabad, Elifelet, Yeremai, Manase deng Simei.
34 Dari Bani satu lai pung turunan: Maadai, Amram, Uel, 35 Benaya, Bedaya, Keluhu, 36 Wanya, Meremot, Elyasib, 37 Matanya, Matenai deng Yaasai.
38 Dari Binui pung turunan: Simei, 39 Selemya, Natan, Adaya, 40 Maknadebai, Sasai, Sarai, 41 Asareel, Selemya, Semarya, 42 Salum, Amarya deng Yusuf.
43 Dari Nebo pung turunan: Yeyel, Matitya, Sabad, Sebina, Yadai, Yoel deng Benaya.
44 Ini dong ni yang kawin campor deng parampuan dari bangsa laen dong yang sonde kanál sang Tuhan. Jadi dong ni yang kasi pulang dong pung bini-ana.
Bagitu sa.