Esra pung Carita
Raja Kores buka jalan ko biar orang Isra'el dong bisa pulang pi dong pung negrí sandiri
(Yeremia 25:11-12; 29:10-14)
1
Dolu, TUHAN Allah su kasi tau Dia pung jubir, nama Yeremia, ko kasi tau sang Dia pung orang Isra'el dong bilang, “Beta pung janji bagini: biar orang Babel dong ame bawa sang bosong, ma lama-lama ju nanti Beta bawa pulang sang bosong pi bosong pung negrí sandiri.”aAis lama-lama, waktu raja Kores baru pegang parenta taon partama di negara Persia,b dia tulis satu surat, ju kirim pi samua tampa yang dia parenta dong. Itu surat pung bunyi bagini:
2 “Dari beta, andia raja Kores, yang pegang parenta di negara Persia. Dengar sang beta.
TUHAN Allah yang pegang parenta di sorga su angka sang beta ko beta parenta samua negrí di bumi. Samua raja laen dong musti dengar sang beta. Tuhan tu, su utus sang beta ko bangun kasi Dia satu Ruma Sambayang Pusat di kota Yerusalem di da'era Yahuda.c 3 Kalo ada di bosong yang jadi itu Tuhan pung orang dong, na, sakarang bosong bole pulang pi kota Yerusalem. Beta pung maksud ko biar bosong tolong kasi bangun kambali Dia pung Ruma Sambayang Pusat di situ. Te Dia tu, bosong orang Isra'el pung TUHAN Allah. Dia ju tenga di Yerusalem sana. Biar ko Dia sama-sama deng bosong tarús!
4 Samua orang Yahudi yang masi idop dong, bole pulang. Ma beta ju minta ko bosong orang laen dong yang tenga badeka deng dong, tolong sang dong ju. Kasi sang dong binatang deng bakál di jalan. Kasi sang dong barang mas-perak deng persembahan laen dong ko dong pake kasi bangun Tuhan pung Ruma Sambayang Pusat di Yerusalem tu.”
5 Dengar itu surat ju, Tuhan bekin orang Isra'el dong pung hati babunga ko mau pulang pi Yerusalem. Kapala agama dong, deng orang suku Lewi yang biasa layani di Ruma Sambayang Pusat dong, deng tua-tua adat dari suku Yahuda deng Benyamin dong, samua siap-siap ko mau pulang pi Yerusalem deng kasi bangun kambali TUHAN pung Ruma Sambayang Pusat yang su ancor tu.
6 Dong ada siap-siap, ju orang yang tenga badeka deng dong bantu kasi dong binatang deng bakál di jalan ju. Dong ju kasi barang mas-perak deng persembahan laen dong deng sanáng hati.
7 Dolu-dolu, raja Nebukadnesar su rampas ame samua barang mahal dong dari Tuhan pung Ruma Sambayang Pusat di Yerusalem. Dia bawa pulang itu barang mahal dong pi dia pung negrí sandiri, ais simpan itu barang dong di dia pung ruma songgo-songgo. Ma sakarang raja Kores sandiri yang kasi kaluar itu barang mahal dong. 8 Ju dia sarakan samua di Mitredat pung tangan. Te Mitredat tu, andia negara Persia pung bendahara. Raja suru bendahara ko itong itu barang dong samua, ais sarakan pi di Sesbasar pung tangan. Te Sesbasar yang pimpin samua pengungsi yang mau pulang pi da'era Yahuda.
9 Daftar dari samua barang yang raja Kores sarakan pi Sesbasar tu, andia:
30 dulang mas;
1.000 dulang perak;
29 mangko perak ko pake bakar dara kayu wangi;d
10 30 mangko mas;
410 mangko perak;
1.000 barang mahal laen dong.
11 Orang laen dong ju kasi barang. Samua-samua tu, andia dong sarakan 5.400 barang mas-perak di Sesbasar pung tangan, ko orang Isra'el dong bawa pulang pi Yerusalem dari Babel.