Mui' fui apisut re' anpoi na'ko tasi
13
Rarit au 'iit mui' fui apisut es anpoi na'ko tasi. In a'naakn ee, 'nakaf hiut, ma in suunk ein nono' bo'es. In npake 'soeb usif anbi in suunk ein mese'-mese'. Anbi in a'naak ein naan matu'i uab re' na're'uf ma nkana'paar Uisneno.a 2 In aon ee, on re' meo 'ro'i. In haek ein, on re' mui' fui kou' gwes re' anteek ee te nak, beruang. Ma in feefn ee, on re' singa in fefan. Kaun naga naan an'ofer in hak ee neu mui' fui apisut naan, he ntoko nbi 'toko prenat, ma anpaek nain in kuasa sin ok-oke'.b 3 Anbi mui' fui apisut naan in a'nakan es, anmui' biki kou' gwes, on re' an'oet niit ee tar antea he noi nmaet, mes kahaf. Are' kanan mansian anbi pah-pinan ansanmakan neun mui' fui apisut naan, rarit sin natuin ee. 4 Rarit sin anhormaat kaun naga naan, ma naikas na'rat-raatn ee on re' Uisneno, natuin kauna' naan anfee kuasa neu mui' fui apisut naan. Mansian ein anbo'is mui' fui apisut naan nak, “In re' naan ma'tain besi! Ka tiit tain fa es he niis ee!”5 Uisneno nkonan mui' fui apisut naan he na'uab rais be'o ma na'uab ankana'paar Uisneno. In napein mainuan he naprenat, tar funan bo' haa mnua (es re' toon teun ma stena'). 6 Es naan ate, in nkana'paar Uisneno. Ma in nkana'paar Uisneno Iin na msa', re' etan sonaf neno tunan.c 7 Uisneno nfee ne mainuan amsa', he in nraban Uisneno Iin na. In napein kuasa msa' he naprenat na'ko are' kanan uuf ma pah, 'pen-pene, ma uab ein anbin pah-pinan.d 8 Natuin rasi naan, are' kanan mansian anbi pah-pinan na'besan neu mui' fui apisut naan. Sin re' naan, es re' tuaf-tuaf re' sin kaank ein ka matu'i fa nbi 'Bib-kaes Ana' In Surat naan. Afi unu', tuaf-tuaf anroor niis 'Bib-kaes Ana' naan, mes Uisneno namonib nafain' Ee. Oras Uisneno ka nmoe' fa pah-pinan ia fa fe', In ntui nrair are' kanan apirsait ein sin kaank ein nak, sin aar sin re' naan, of napenin 'monit re' amneot ma amnonot, re' ka natfeek fa.e
9 “Amneen mirek-reko'!
10 Karu Uisneno nafeek anrair nak, anmui' tuaf re' ro he nheek naan ee,
of anheek naan ee.
Karu Uisneno nafeek anrair nak, anmui' tuaf re' ro he napein roro' neik suni',
of anroor gwe neik suni'.”
Etun Uisneno Iin na, kais amtet-koit. Naan anjair oras mainuan he maran ma mituin piut ma mpirsai piut-piut meu Ne te!f
Mui' fui apisut re' anpoi na'ko pah-pinan
11 Rarit au 'iit mui' fui apisut es anteni', anpoi na'ko pah-pinan. In suunk ein nono' nua, on re' 'bib-kase in sunan. In haan ee, on re' kaun naga in hanan. 12 In njair mafefa' neu in usin, es re' mui' fui apisut ahunut re' afi unu' an'oet je ma he noi nmaet. In antoup kuasa na'ko in usin naan, he na'seke' are' kanan mansian pah-pinan he na'besan neun in usin. 13 In nmoe' rais sanmakat ma'tani' amsa', tar antea in bisa nasanut ai na'ko neon gwe tnanan, anbi mansian ein sin humak ma sin matak. 14 Nok ranan naan, mui' fui apisut no nuan naan, anpaek in uisn ee in kuasan he nputa-kriu mansian abitan pah-pinan. In naprenat mansian ein amsa', he nahakeb faut maruna', on re' in uisn ee human, he sin anhormaat ee. In usin naan, es re' afi unu' an'oet je ma he noi nmaet. 15 Uisneno nkonan mui' aputa-kriut naan amsa', he nfee snasaf neu faut maruna' naan. Es naan ate, faut maruna' naan bisa na'uab ma nfee prenat he nroor niis tuaf-tuaf re' ka na'besan fa neu ne.
16 Mui' fui aputa-kriut naan, na'seke' are' kanan mansian he ntoup in marak anbi sin a'niim a'ne'u, ai' anbin sin iirk ein. Are' kanan mansian, ana'-ko'u, amu'it-ama'mu'it, atoin merdeka ai' ate msa', sin ar-arsin ro he ntoup marak naan. 17 Karu ka on naan fa te, sin ka bisa fa he na'soos ein, ai' ansosan saa'-saa'. Anbi marak naan, matu'i mui' fui apisut ahunut naan in kanan, ma in nomer.
18 Anbi re' ia, tperluu he tpaek ronef! Atoin ahinit, bisa nahiin nomer naan in oten. Nomer naan es re' nruur ma nreek naan mansian tuaf es, es re' “666”.g