Uisneno In mafefa kninu' tuaf nua, re' ma'tain' ein
11
Rarit sin nnona' kau hau ukur noon es, re' amnaun ii neeh jes. Onaim Uisneno naprenat kau mnak, “Yohanis, amfeen nai he mnao m'ukur Au Uim Onen Uuf nok in mei fuat, et kota Yerusalem. Ma msoi' are' tuaf-tuaf re' sin ar-arsin an'oen ein nbin bare naan.a 2 Mes kais am'ukur Uim Onen naan in kintal, natuin bare naan manona' nrair neu uuf ma pah bian re' ka nahiin Kau fa. Sin of anteir hae ma n'oemetab Au kota naan, tar antean funan bo' haa-mnua (es re' neno niufn es natun nua mbo' nee—1.260)b 3 Au of a'reek haef tuaf nua 'eu bare naan he sin njarin Au mafefa kniun' ein. Sin of anpaken tai-nukat, rarit an'eut ma natoon rais manba'an na'ko Kau, tar antea neno niufn es natun nua mbo' nee naan namsopun.”4 Uisneno In mafefa kninu' nai' Sakarias antui nrair na'ko afi unu' anmatoom nok mafefa kninu' tua nua' ein ia. In npaek uab nak, anmui' hau saitun 'u'u nua nok baer toras paku re' anbain ein n'ain Uisneno, es re' mansian pah-pinan sin Usin.c 5 Karu nmui' tuaf re' anroim he nsirakab Uisneno In mafefa kniun' ein ia, of anmui' ai anpoi na'ko sin feefk ein ma nout nakrati' sin muusn ein ok-oke'. Nok ranan naan, are' tuaf re' he nha'mui' sin, ro tebes anmaten. 6 Oras sin nua sin anjarin Uisneno In mafefa kniun' ein anbin pah-pinan, In nfeen sin kuasa he n'eka' uran. In anfee kuasa msa' he nmoe' oe maat ein anjarin naa', ma kuasa he neik rais ha'mu'it huma'-huma' nbi pah-pinan, natuin sin roimk ein kuuk.d
7 Karu sin oras he natoon Uisneno In rais manba'an naan namsoup, of mui' fui apisut es anpoi na'ko nuat ha'mu'it re' ka ma'u'u fa naan. In of anmakeen nok tua nua' ein naan, tar antea in niis naan sin, ma na'maet sin.e 8-9 Nok ranan naan, sin nua sin anmaten anbin kota ko'u re' afi unu' te, biak ein anroor niis sin Uisn ee nbi hau nehe. Kota naan, anjari nrair koot maufinu on re' Sodom ma Masir afi unu'. Onaim sin of anporin napoitan mafefa kniun' ein naan sin aok amaets ein naan anbin ranan, tar antea neno teun ma stena'. Rarit mansian na'ko are' kanan uuf ma pah, ma uab, ma 'pen-pene, neman ma nkius tua nua amaets ein naan. Sin ka nfeen fa mainuan he nsuub sin imsa',f 10 natuin sin nmarinan he nkius kuuk tua nua amaets ein naan. Fin sin nua sin es re' nok-noik mansian pah-pinan sin tenab. Onaim sin ar-arsin anmo'en fesat, ma anma'ook soun ein es nok es.
11 Mes neno teun ma stena' naan namsopu te, of Uisneno anfee snasaf neu sin, he sin nmoni nfanin. Rarit are' kanan mansian re' niit sin on naan ate, na'ta'in me-meot gwah.g 12 Rarit mafefa kniun nua' ein naan of annenan hanaf ma'tain es na'ko neon gwe, re' anreek sin am nak, “Hae! Hi nua ki msae iim nai!” Onaim sin nua sin na'ait ok ansaen on neno ma noep je an'aum naan sin. Ankius nitan on naan ate, sin muusn ein antaka'naan ein.h 13 Nok askeken ate, auf gwi na'beko' ma'tani'. Karu hit tsoi' umin anbin kota naan, na'ko umi bo'es, uim jes antaikoib. Ma anmui' tuaf nifu hiut anmaten. Tuaf bian re' ka nmaten fa, namtaun nmaten. Mes sin of anhormaat Uisneno, natuin In es re' annaa' aprenat nbi sonaf neno tunan.i
14 Nok ranan naan, siraak no nuan ii namsoup gwen. Mes ampaant om, oo! Siraak no teun ii he neem een.
Anfuu to'is no hiutn ii — Uisneno ma Yesus Kristus anna'an aprenat anbin pah-pinan
15 Rarit Uisneno In ameput na'ko sonaf neno tunan no hiutn ii nfuu in to'is. Nok askeken ate, au 'neen a'roots ii neman na'kon sonaf neno tunan am nak,
“Oras ia, anaa' aprenat anbi pah-pinan,
suma arahaa Uisneno ma Yesus Kristus,
es re' Tuaf re' Uisneno npiir ma mbetis nain Je na'ko afi unu'.
Uisneno of annaa' aprenat piut-piut on re' Usif, tar antea nabar-baar.”j
16 Amnasit tuaf bo' nua mhaa re' antokon nbin a'toko preent ein anbin Uisneno In human ma In matan naan, sin nnenan haanf ein naan amsa'. Rarit sin nri'tuun, ma naikas na'ratan Uisneno, 17 neik siit pures-bo'is am nak,
“Koi, Uisneno!
Hai Usi'!
ma hai Ama' Uisneno!
Ho es re' muprenat are' saa'-saa'.
Ho es re' amkuaas are' saa'-saa'.
Ho es re' mu'ko un-unu' te, ambi main naa.
Ho es re' oras eti ia ambi naa msa'.
Hai mtoit makasi meu Ko, tua,
natuin Ho mpaek Ho kuasam re' ma'tani',
he mnaa' aprenat ambi pah-pinan.
18 Mes uuf ma pah sin nato'on,
natuin sin ka nromin fa he natuin Ko, tua.
Mes oras ia, Ho muto'o msa',
natuin sin ka nromin fa he nahiin Ko.
Oras ia in oors ee ntea gwen,
he Usi' amhukun tuaf-tuaf re' ka nroim he ntoe natuin Ko fa, tua.
Oras ia in oors ee ntea gwen,
he Usi' mureu' miis tuaf-tuaf re' nareu' niis tuaf bian sin.
Oras ia in oors ee ntea gwen,
he Usi' amparikas amaets ein sin rais saant am penu sin, tua.
Oras ia in oors ee ntea gwen,
he Usi' ambaras Uisneno In ameupt ein sin maskeet.
Es re' Ho mafefa kniun' ein,
ma Ho nggwin,
ana'-ko'u, mnasif-mainuki'.
Usi' ambaras meu sin aar sin,
re' anhormaat Ho kaanm aan, tua.”k
19 Rarit au 'iit a'bi sonaf neno tunan, Usi' In Uim Onen In eon' ee masoita'. Onaim au 'iit peit-kere re' afi unu' sin natunu' Uisneno In preent ein re' matu'i nbi fatu. Rimat sin nariman ma nmatarun neu-mneman, pah ii na'beko', ma uran eis faut ma'fena' nmoufun na'kon neon gwe tnanan.l