Usif Yesus anfee haan manbasan neu jema'at anbi kota Efesus
2
Rarit Mansian Batuur-Batuur naan naprenat kau mnak, “Yohanis, ho ro he mtui surat noo gwes. In haan ee, on nai:‘Neu jema'at abitan kota Efesus:
Surat re' ia, na'ko Au, Nai' Yesus Kau. Au es a'naa' kfuun hiut etan Au 'nimak a'ne'u. Au es a'nao 'fuun utef-tefan ma 'noon pauk noni fua' hiut ein naan mese'-mese'. Amneen Au uabak re' ia.
2 Au 'iit urair hi 'monim ambi kota Efesus 'ak, hi mmeup ma'tani' piut-piut meu Uisneno. Karu anmui' atoin maufinu nbi hi tnaanm ein naan, hi ka mkonan sin fa. Karu anmui' tuaf neem he nputa-kriu ki mnak, in re' naan Uisneno In haef, hi ro miprikas ma mtae mirek-reko' in a'monin naan, he hi mihiin je mmak atoin saa' na es re' naan mansian aputa-kriut, ai' kaah. Rarit hi mtitar ma mtoork ee, he ka mitniin ee fa. 3 Maski atoni' nasusab ki natuin hi mpirsai meu Kau, mes hi maran piut, ma ka mtet-koit fa.
4 Mes Au 'kius, hi mmoufu mbi rais jes. Natuin afi unu', oras hi fe' mmurai mpirsai meu Kau, hi mmaneek es nok es. Mes oras ia, hi ka on fa nana gwen antein. 5 Onaim hi ro he mimnau oras unu' naan. Fin oras ia, hi mi'roo mi'ko 'mo'et unu' re' naan. Es naan ate, hi ro he mi'piis nai mi'ko hi sanat re' ia, he mfani mmaneek on re' neno unu' naan. Karu ka on naan fa te, of Au 'fain 'uum 'ait ufani' pauk noni na'ko ki. 6 Mes Au neek ii nmariin akre'o, natuin hi mtitar mipasib nai' Nikolas in noin' ein, re' in atoup noin' ein anmoe' natuin ee. Au 'titar upasib amsa' saa'-saa' re' sin nmoe' sin.a
7 Amneen mirek-reko' saa' re' Uisneno In Asmaan ee natoon neu In jemaa't ein. Sekau naran ma natuin Kau tar antea in nmaet, Au of a'fee ne mainuan, he naah hau fua' re' anbi Uisneno In po'on. Fin sekau naah hau fua' naan ate, in napeni 'monit batuur re' ka natfeek fa.’”b
Usif Yesus anfee haan manbasan neu jema'at anbi kota Smirna
8 Rarit Mansian Batuur-Batuur naan antuut antein In uaban naan am nak, “Yohanis, oras ia ho ro he mtui surat es anteni'. In haan ee, on nai:
‘Neu jema'at abitan kota Smirna:
Surat re' ia, na'ko Au, Nai' Yesus Kau. Are' saa'-saa' ii sin na'uun ma na'ba'an nbin Kau, anmurai na'ko ahunut tar antea amunit. Unu' te, Au 'maet, mes oras ia, Au 'moni 'fain. Onaim amneen Au uabak re' ia.c
9 Au 'iit urair hi 'monim re' amsuus mbi kota Smirna. Tatuin mansian ii te, hi re' ia atoin ama'mu'it. Te kaah, natuin Uisneno te, hi amu'it ki. Anmui' tuaf re' anmanaku' mnak In re' naan Uisneno Iin ja, re' na'uab na're'uf hi kanam areokt ein. Te kaah, sin re' naan, ka Uisneno Iin na fa. Sin on re' jema'at es, re' natun-tuin ahaa niutn ee sin a'nakat. 10 Onaim amneen mirek-reko'! Hi kais mimtau, oras hi mipein susat fe'. Asar hi mihiin mak, niutn ee sin a'naakt ee, naim tuaf he nheek sin, ma nataam bian neun bui tar antea neno bo'es. In sairt ii nak, he hi mkoit Kau. Maski sin he nroor niis ki, mes hi kais amnikan Kau. Fin sekau-sekau naran ma natuin Kau tar antea in nmaet, Au of a'baras a'fee ne upan, he in nmoin nabar-baar nok Kau.
11 Onaim amneen mirek-reko' saa' re' Uisneno In Asmaan ee he natoon neu In jemaa't ein. Sekau re' naran ma natuin Kau tar antea in nmaet, in ka napein fa ha'mu'it anbi tais ai maputu' re' anpiin nabar-baar. Nok ranan naan, in ka nmaet fa no nua.’”d
Usif Yesus anfee haan manbasan neu jema'at anbi kota Pergamus
12 Onaim Mansian Batuur-Batuur naan antuut antein In uaban naan am nak, “Yohanis, oras ia ho ro he mtui surat es antein. Surat naan in haan ii, on nai:
‘Neu jema'at abitan kota Pergamus:
Surat re' ia, na'ko Au, Nai' Yesus Kau. Au es a'naa' suin 'aik nua'. Amneen Au uabak re' ia.
13 Au uhini 'rair hi abitan kota Pergamus naan. Anaa' aprenat anbi naan es re' nitu 'nakaf. Maski on naan amsa', hi mnaa' miher-heran Au kanak ma mpirsai Kau piut-piut. Unu' te, Au tuaf es anbi naan, kaann ee nai' Antipas. In nanoni' namneo anmatoom nok Au raan a'honis, mes sin nroor na'mate. Maski on naan amsa', mes hi ka misuan Kau fa.
14 Mes Au 'iit 'ak, hi mmoufu mbi rais jes a'nua. Anmui' tuaf na'ko ki re' nroim he natuin Balaam in nonin. Unu' te, Balaam nanoni' nai' Barak he na'oki' atoin Israelas sin, tar antea sin ntanhai Uisneno In romin. In na'oki' sin he sin nokan nfuan, ma nahan mnaah fuat, ma nnao nmakaken nok tuaf re' sin ka moen ein fa, ai' sin ka feek ein fa.e 15 Anmui' tuaf fauk na'ko ki, re' natuin nai' Nikolas in nonin.f 16 Onaim hi ro he misnaas mi'ko hi saant ein naan. Karu kaah, ka 'roo fa te, Au 'uum a'keo' ki 'eik uab 'aikan, re' n'oet ki nahuum on re' suni'.
17 Onaim amneen mirek-reko' saa' re' Uisneno In Asmaan ee natoon ee neu In jemaa't ein. Sekau re' naran ma natuin Kau tar antea in nmaet, Au of a'fee ne utunu' manna na'ko sonaf neno tunan he nbukae. Utunu' naan napera' narek-reok' ee. Au 'fee ne faut muit es amsa', re' matu'i in kaan fe'u. Suma in tuan aa kuun es re' nahiin kanaf naan, mes tuaf bian ka nahiin je fa.’”g
Usif Yesus anfee haan manbasan neu jema'at anbi kota Tiatira
18 Rarit Mansian Batuur-Batuur naan antuut antein In uaban naan am nak, “Yohanis, oras ia ho ro he mtui surat es antein. Surat naan in haan ii, on nai:
‘Neu jema'at abitan kota Tiatira:
Surat re' ia, na'ko Au, Nai' Yesus Kau, es re' Uisneno In Anah! Au maatk ein anpinan on re' ai, ma au haek ein npiin me'e on re' beis me'e amsa', re' atoni' nout gwe et ai. Amneen Au uabak re' ia.
19 Au 'iit urair hi 'moinm ein naan. Hi mneek Kau batuur-batuur, ma mpirsai Kau nok ma'tani'. Hi mituin Au prenat piut-piut he mtuthae tuaf. Maski atoni' nha'mui' ki msa', hi maran piut-piut. Au uhini msa' 'ak, oras ia hi mmeup ma'tani' nneis antein meu Kau.
20 Mes hi mmoufu mbi rais jes: hi mtoup bi Isabeel, re' naikas in tuan ee mnak, Uisneno In mafefa'. Rarit hi mkoon ee he in nanoni' nsaan neu Au nggwin. Natuin in noni' re' na'e'ob naan, es Au nggwin, nahan amnaah fuat. Ma sin imsa' nmakaken nok tuaf re' sin ka moen ein fa, ai' sin ka feek ein fa. 21 Au ukain bifee naan fani-fani, he in nasaitan in sanat naan. Mes in ka nroim fa.
22 Onaim amkius mirek-reko'. Fin oras ia Au ufeek a'rair, he 'huukn ee 'paek menas huum es, tar antea in ka nsaun naan fa na'ko in harak. On naan amsa' sin ar-arsin re' anmakaken nok ne. Karu sin ka nasaitan fa bifee maufinu naan ate, ka 'roo fa te, Au 'hukun sin amsa'. 23 Au of u'maet bifee maufinu naan in aanh ein. Nok ranan naan, hi ok-oke' re' apirsait ki mihini mmak, Au uhiin mansian ein sin neek ein. Ma Au of a'baras amsa' 'eu ki, utuin saa' re' hi mmoe'-mo'e.h
24 Mes hi bian re' abitan Tiatira naan, hi ka mituin fa bifee maufinu naan in nonin amre'ut naan. Natuin hi mtitar mipasib noni' re' ma'nifa' naan, re' sin nteek ee nak, ‘niut re'uf in noin meis'okan’. Nok ranan naan, Au ka ukain a'tein ki fa, 25 asar hi mnaa' miher-heran hi rais pirsait, tar antea Au 'fain 'uum. 26-28 Sekau re' naran ma natuin Kau tar antea nmaet, Au of a'fee ne kuasa. Kuasa naan ma'tani', on re' Au upein je na'ko Au Ama', he uprenat uuf-uuf anbi pah-pinan nok a'niim maputu'. Karu anmui' tuaf anraabn ee, in of antuut nakrati' sin, on re' tapee' a'nai afu.i Au of a'fee ki kfuu faif nome amsa'.
29 Onaim amneen mirek-reko' saa' re' Uisneno In Asmaan ee natoon ee neu In jemaa't ein.’”