Nai' Paulus ankius rais jes anbi mnitas
12
Karu hi mroim, maut he au ufeef a'tein. Te kaah tafeef ate ka ma'osa' fa. Mes au 'roim he utoon 'eu ki rasin re' hit Usi' naruru' ma nakrira' nrair sin neu kau nbi mnitas. 2-4 Au uhiin tuaf es, re' anmafuut nok Kristus. Toon bo'es am haa akoont ii, anmui' tuaf re' nasaeb ee nbi neon gwe tnanan re' mnaun re'uf. Mes au ka uhiin fa 'ak, in nsae neik in aon ee oo, ai' in asmaan ee es asaet. Suma Uisneno es ahinit. Au uhini msa' 'ak, oras in na'aiti' nsae neu Uisneno In Baer Reko naan, in nneen uab ein re' atmasahun sin, tar antea mansian ii ka bisa na'uab fa saa'-saa'. 5 Onaim neu atoni' humaf on re' naan, au he ufeef. Mes au ka ufeef fa 'matoom nok au tuak ii. Mes anmatoom nok rasi re' au ka bisa 'moo' je fa te, na' au ufeef on naan. 6 Karu au ufeef, au ka 'perluu fa he upoi, fin au 'mui' rasi mfaun re' batuur re' au bisa u'uab sin. Mes au 'tahan kuuk au tuak, he atoni' kais natenab nak, au reko 'neis u'ko saa' re' sin nneen ma nkius niit ee na'ko kau. 7 Anneis-neisi ntein, Uisneno naruru' ma nakrira' kau rasi mfaun re' ma'tani'.Mes au upein susat amsa', maut he au kais ubeo'. Fin niut reu'f ein sin a'nakat anreek in ameput es he noik kau piut, on re' 'aika' napau au aok ii fani-fani. Airoo! Au 'suus batuur-batuur! 8 Anfain no teun gwen, au 'toit he Uisneno nait inporin rasi ia na'ko kau. 9 Mes In nataah kau mnak, “Au ururu' ma ukrira' Au nekak arekot 'eu ko. Naan nanokab neu ko. Fin oras ho mukeo ma msadaar mak, natuin ho 'be'im kuum ka nanokab fa, anbi naan Au kuasa na'baab on piut.” Es naan ate, au he ufeef a'tein, oras au ka 'moe' ubei' fa rais jes. Fin nok ranan naan, au uhiin 'ak, Kristus In kuasa nmoin et au nekak. 10 Es naan ate, karu au 'naben 'ak, au ka 'meup ubei' fa rais jes a'mees, au neek ii ntainina'. Onaim oras atoin ein ankana'paar kau, ai' nasusab kau, ai' anha'mui' kau, ai' natuin au 'jair Kristus Iin ja, au neek ii ntainina' nabaar aah. Fin karu au ka ubei' kuuk fa te, au upein kuasa u'ko Kristus he au ubei' rasi naan.
Nai' Paulus natenab anmatoom nok apirsait ein abitan Korintus
11 Hi 'moinm ein nahuum on re' Uisneno ka nreek niit kau fa 'eit 'eu bare naan. Es naan ate, hi mromi ai' ka mroim fa msa', fe'e na au u'uab fare' kre'o. Amneon ii, hi ro he es re' mifeef anmatoom nok kau. Ro tebes, au ka ma'osa' fa. Mes karu hi mitaib kau mok “haef ein re' ma'tani' nneis” re' nak Uisneno nreek haefan sin, sin re' naan ka ma'tani' nneis fa na'ko kau.
12 Ansuun oras Uisneno nreek haefan tuaf es he natoon anmatoom nok Ne, tuaf naan anmoe' rais sanmakat huma'-huma' npaek kuasa he naruru' ma nakrira' bukti mnak, Uisneno es re' anreek haefn ee. Mes kais amnikan, fin oras au 'bi hi sonam ma hi tnaanm ein, au 'moe' rais sanmakat amsa' on re' naan. Mes au 'meup on naan nok sabaar piut. 13 Mes kais mitoo', tua! Suma rasi mees' aah, re' au ka 'moo' je fa 'eu ki, re' tuaf bian nmoo' je nbi jema'at bian. Rasi naan es re': au ka 'toit ki fa he hi misaah ma mitaah kau.
14 On nai! Au ubarab a'rair he 'uum 'eu ki no teun ii. Au ka 'perluu fa he hi misaah ma mitaah meik noni-roit meu au 'monik. Au ka 'perluu fa msa' hi 'mui'm ein. Fin, natuin hit harat, ka pantas fa he ri'aan ein natunu' 'mu'if neu sin mahoint ein. Re' pantas ji, mahoint ii es re' natunu' 'mu'if neu sin aanh ein. Onaim au ka 'perluu fa he hi mitunu' 'mu'if meu kau, fin hi on re' au aanh ein! Re' au 'perluu gwe jaan, es re' hi tuam ein ma hi maneekm ein. 15 Au 'roim he 'soos bare' he 'fee ki. Au 'meup ma'tani' msa', maut he hi bisa mmoin mituin Uisneno In romin. Karu au 'neek 'iis ki, hi ro he mneek kau on naan amsa'. Onaim nansaa' am es hi mtahan hi rais manekat naan? Ka pantas fa, tua.
16 Anmui' tuaf na'ko ki re' anmanaku' mnak, au ka usaeb ki fa ma'fena'. Mes anmui' tuaf re' nak, au 'jair tua aputa-kriut ma'tani' ma upoi ki, tar antea 'moe' ki mituin au romik. 17 Onaim on mee? Of oni' tuaf ein re' au 'reek sin 'eu ki naan, napoi naan ki, oo? 18 Fin au 'furi' nai' Titus he neit nateef nok ki. Au 'reek haef amsa' na'ko hai aok-bian sin tuaf es antein, he neit nok ne. Of oni' nai' Titus napoi naan ki, oo? Kaah fa, tua. Fin nai' Titus nok kau re' ia, huma' mese'. Hai mmeup mepu re' huma' mese', fin hai nua kai teenb ii, huma' mese' msa'.
19 Aok-bian manekat aar ki! Of oni' hi mitenab mi'ko fe'e na mmak, hai mimneob hai tuam ein ambi hi humam ma hi matam? Kaah fa, tua! Fin are' saa' ii re' hai mi'uab sin re' ia, Uisneno nahiin anrair sin. Onaim hai ka bisa mi'koro' fa saa'-saa' mi'ko Na. Hai mmafuut mok Kristus amsa'. Natuin hai mneek ki, es naan ate are' saa' re' hai mmoe' sin naan, nok sarit he hai bisa mmoe' ki he mi'bei'.
20 Karu au 'jair he 'eit 'eu ki, au utenab, kais-kaisa' hi ka mjair fa tuaf on re' au romik. Fin kais-kaisa' anmui' tuaf re' anmatoe, re' neekn ee nameen, re' natunu' nekaf, re' natenab naan in tuan aa kuun, re' na'uab na're'uf es in kanan, re' na'uab re'uf neu es, re' abe'ot, ma re' nareu' are' saa' ii. Of oni' au 'jair tuaf re' hi ka mroim je fa msa'. 21 Karu au 'eit 'eu ki, au utiun gok natuin hi 'moe'm ein. Kais-kaisa' Uisneno he namae kau 'bi hi humam ma hi matam. Kais-kaisa' au 'moe' tuaf annaben ma'fena', natuin tuaf amfaun na'ko ki re' nmonin nbin 'moe' maufinu fe', mes ka mroim fa he mi'piis, he mibani' mfain mituin Uisneno In raan amneot ma amnonot. Sin nhai'niis jok! Fin anmui' tuaf re' anmakoin nok tuaf re' in ka fee ja fa, ai' in ka moen ja fa. Sin nmo'en huma'-huma' mes sin ka namaeb ok fa, tua.