Uisneno Iin na es re' nanaob Rais Manba'an Fe'u
3
Kais mitenab mak, hai mmurai mifeef ko'u, he mi'ratan hai tuam ein. Kaah fa, tua! Of oni' hi mitenab hai on re' atoni' bian re' anperluu he neik surat es, re' nareta' anmatoom nok sin meupk ein neu ki, na' hi mfei ranan meu hai mepu, oo? Ai' hai mperluu he mtoit surat on re' naan mi'ko ki he hai meik je meu atoni' bian? Kaah fa, tua! 2 Fin hai suurt es hi mnaa' amrair je. Surat naan, es re' hi kiim. Fin hai mihiin rasi mfaun anmatoom nok hi 'monim. Rasin naan mahiki' ma matunu' nbi hai nekam. Are' tuaf amfaun bisa nresan kuuk hi 'monim; na'ko naan sin bisa nahiin hai meup gwi in afan. 3 Fin nakninu' nrair nak, hi on re' suurt es, re' Kristus antui. Rarit In nnona' ntaahn ee neu kai. Kristus ka npaek fa tinta he ntui surat naan, mes In anpaek Uisneno re' Anmoin In Asmaan Akninu'. Kristus ka nruun fa In Kabin ma Prenat anbi faut bena' amsa', nahuum on re' Uisneno nmoo' je neu nai' Musa. Mes In ntui nbi hit nekak amonit.a4 Hai mihiin mak, hai bisa mpirsai meu Uisneno mak, rasin re' ia ok-oke' ro batuur, natuin Kristus es re' naruru' ma nakrira' nrair sin on naan. 5 Karu na'ko hai tuam ein aah ate, hai ka mmui' fa kuasa he mmoe' saa'-saa'. Fin kuasa ma hak re' hai mnaa' ee ji, na'uu ma na'baa' nbi Uisneno. 6 Uisneno re' naan, es re' nait kai mjair In ameput re' he mitoon meu tuaf anmatoom nok In Rais Manba'an Fe'u. Mes In Rais Manba'an Fe'u naan, ka nmatoom fa nok atoni' nmoe' natuin atoran huma'-huma', mes anmatoom nok atoni' anmafuut nok Uisneno In Asmaan Akninu'. Karu atoni' suma nmoe' natun-tuin ahaa atoran, naan on re' sin anmaten anbin sin neek ein, ma ka napenin fa 'monit re' namneo ma namnoon, re' ka natfeek niit fa. Mes karu atoni' nmoni nmafuut nok Uisneno In Asmanan, in napein 'monit re' namneo ma namnoon.b
7 Unu' te, oras Uisneno nruun In Atoorn ein anbin faut been ein, naan ro mapina'-makraha'. Maski atoni' nmoe' natuin Atoorn ein naan ok-oke', mes sin nbeits ok fe' na'kon Uisneno. Rarit, oras nai' Musa ntoup naan Atoorn ein naan, in huumn ee anpiin ma masnaa pina' ma kraha'. Etun atoin Israelas sin ka bisa nkius niit fa in human. Mes a'roo-'roo te, pina' naan namneuk.c 8 Onaim karu re' ma'tu'i nbi fatu in mapina'-makraha' on naan, on mee nok saa' re' Uisneno In Asmaan ee ntao gwe nbi hit nekak nanan? Ro tebes in he mapina'-makraha' nneis, tua. 9 Atoran naan naruru' ma nakrira' nak, hit ro he tapein hukun a'maten he tbeits ok ta'ko Uisneno, natuin hit ka tmoe' tatuin fa Atoorn ein naan ok-oke'. Maski on naan amsa', mes Atoran naan ma'tani' nabaar fe'. Mes Uisneno In Asmanan ma'tani' nneisi ntein, fin In naruru' ma nakrira' ranan he hit bisa tmarame' tfain tok Uisneno. 10 Onaim Atoran re' unu' fe'e te atoni' naan ee neu ma'tani', oras ia ka ma'tani nneis fa gwen, fin oras ia nmui' re' ma'tani' nneis. 11 Atoorn ein naan sin ma'taink ein, on re' ka'o Musa in human, re' unu' te masnaa pina', rarit in piin ee namneuk. Nai' Musa ma Atoran naan ma'tani' fe', mes re' ma'tani' nneisi ntein, es re' In ma'tanin antahan piut ka natfeek niit fa, tua.
12 Hit aar kit tahiin tak, Uisneno In Rais Manba'an Fe'u naan antahan piut, ma ka natfeek fa, tua. Es naan ate hai mi'uab maat-maat, ma ka mi'aib ee fa, tua. 13 Hit kais atmoe' on re' ka'o Musa. Fin in ro he nkuub in human anpaek tais, maut he atoin Israelas sin ka nkius niit ee fa karu pina' naan namneku nrair.d 14 Mes Uisneno nmoe' atoin Israelas sin roenk ein anbufun. Fin tar antea oras ia msa', karu sin nresan anbin Uisneno In Suur Akninu' anmatoom nok In Rais Manba'an Amnaa' re' naan, naan on re' tais es ankuub naan sin a'naak ein, he sin ka nneen ma natniin fa, ma ka nromin fa he nahinin. Ka nmui' fa tuaf anteni' re' bisa nfei sin neek ein he bisa nahinin. Suma Kristus anmees jah. 15 Tar antea oras ia msa', karu atoin Yahudis sin anresan saa' re' ka'o Musa antui sin, sin nnenan ma natninan, mes sin ka nahinin fa nok reko. Naan, natuin sin ka nneen anpaken fa sin neek ein, nahuum on re' saa' es antoeb naan sin neek ein.
16 Mes karu nmui' tuaf re' nmurai npirsai hit Usi' Yesus Kristus ate, Kristus anfei tuaf naan in nekan maut he in bisa nahiin batuur-batuur. Naan on re' ma'tu'i et Suur Akninu' Uisneno mnak, “In nfei nrair tais re' nkuub in human.”e 17 Anbi Suur Akninu' Uisneno, oras ka'o Musa na'uab am nak, “Usi'”, in sairt ii Uisneno In Asmanan. Karu hit tapein Asmanaf naan, In nafetin kit. 18 Nok ranan naan, In nmoe' kit ta'ko neon gwes teu neon gwes hit tpiin ma takraah, on re' In. Hit kais atkuub hit huumk ein ttein. Ma hi tatenab piut anmatoom nok hit Usi' In pinan ma krahan, fin In Asmaan ee anturun kit on re' naan.