Tuang Yesus wapubirang talaqa gafa'a-gafa'a inplawang gadu
(Mateos 13:1-9; Lukas 8:4-8)
4
Malla nukku, Yesus ola dano Galilea gia, ba wa'ang indumma anna Ga'ing arabbu. Gang galla cira hee nukku suma tagga missi gi'ing ajar. Wa'ang dano gara missi gopa'i Gamang watti.a 2 Gang wapubirang pake gi'ing ajar dumma-dumma akku,3 "Hing watti go-go, ee! Wa'ang nukku gia maxara gammi inplawang braki. 4 Sudana gang inplawang braki su'u, dena yia bagga ba'a, ba daia ina su'u anna inplawang tui na ela glalla. 5 Dena talaqa wala dumma gammi ba'a. Inplawang su'u qutta cargatta. Tapi talaqa su'u qorunnu qai. 6 Ba sudana weri cira, ina qutta su'u plefu cicci galla minna. Karna gagga halli cukku talaqa gammi ba'a kuyang waai.
7 Inplawang dena too mahang gammi ba'a. Too mahang ina su'u ina qutta prunni ela minna ba hicci waai. 8 Tapi inplawang dena su'u talaqa hicci tagga ba'a. Inplawang ina su'u qutta da ada, sampe hicci wanna. Dena hasil gola malla qaa hathagu, dena malla qaa tiama, mari dena su'u malla ratu nukku.
9 Hi'ing yamma ba hiowa'a wanna su, watti go-go, ee!”
Tatali ba Tuang Yesus wapubirang ma birang
(Mateos 13:10-17; Lukas 8:9-10)
10 Sudana su'u Yesus anaqai, Gai knii lamma qaa nukku wai raqqu mari wa'ang faqa gagga Gai ajaran watti wouwa su'u, anna Gatarana. Ging banga Gang wapubirang su'u gai arti ma giabirang. 11 Ba Yesus giamaragu akku, "Hing mau ecicci Tuang Latala Gai parenta klala, su'u ba Nang wapubirang gai arti su'u ma hiabirang lamanna. Tapi wa'ang gafa'a Nang wapubirang ba ma gi'ing ajar. 12 Wa'ang gafa'a su'u gi'ing dagi Tuang Latala Gai birang pinni waci tulis wouwa akku,
‘Ging billi wouwa, tapi ging mangarti itawaya.
Ging watti wouwa, tapi ging klala itawaya.
Ema ging Latala parcaya oli,
su'u ni Latala ampong ma gina oli.”’b
Tuang Yesus wapubirang su'u gai arti birang
(Mateos 13:18-23; Lukas 8:11-15)
13 Qauwa ba Yesus wapubirang su'u gai arti ma giabirang akku, "Hing yedda wapubirang sa'a gai arti mangarti waai, hing tatali wapubirang gagga faqa gai arti klala qauwa? 14 Gagga arti gsali: wa'ang inplawang braki su'u dagi wa'ang gagga Tuang Latala Gai Birang-gamang ma lee giabirang nissi. 15 Inplawang gagga yia bagga ba'a daia tui glalla su'u, dagi wa'ang gagga Tuang Latala Gai Birang-gamang watti nissi. Yung na waai, snara ina gi ada anna Birang-gamang gammi gammi mia su'u mari ga gia. 16 Inplawang gagga talaqa wala dumma gammi ba'a su'u, dagi wa'ang Birang-gamang su'u watti, ging galla mari ammi mia. 17 Tapi Birang-gamang su'u halli ba'a waai. Su'u ba gang wa'ang su'u gammi issi yung waai. Sudana wa'ang dena ela gang sussa, karna gang Birang-gamang su'u trima, gang galla Birang-gamang su'u mari cua. 18 Inplawang gagga too mahang gammi ba'a su'u, dagi wa'ang gagga Birang-gamang su'u watti wouwa. 19 Tapi gang urusan gafa'a-gafa'a ba wa pata tafura, su'u ni gang bangnga mnaha-mnaha gaggi. Ba urusan ina su'u Birang-gamang gammi mia'a su'u mari alaaqi cua sampe gagga hicci wanna waai. 20 Inplawang gagga talaqa hicci tagga ba'a su'u, dagi wa'ang olaworu Latala Gai Birang-gamang su'u watti, asa Latala Gai yawa galanna nissi. Ni gang ina qauwa-qauwa qai ela, dagi inplawang gagga hicci wanna nissi. Dena gagga hicci wa gola malla qaa hathagu, dena malla qaa tiama, mari dena su'u malla ratu nukku.”
Bukal mari plita ta wadda oli
(Lukas 8:16-18)
21 Yesus hee tagga missi birang lalu. Gang wapubirang nukku ma ta'a akku, "Tatali? Hi'ing parna billi lee bukal mari plita ta wadda? Ai plita mari balli yeguana miggi? Waai su! Kalo miggi gsuli, gang illa wa blola waai. Lee kuddi plita mari i liawang tagga miggi ni gang illa wa blola.c 22 Ina gagga waddi sa'a endaga waai, maqa gang endaga. Ina gagga waddi sa'a lee klala waai, maqa lee klala.d 23 Hi'ing yamma ba hiowa'a wanna, watti go-go.
24 Qauwa ba pikir go-go! kalo hing lee gi'ing wa suddi, maqa lee na'a hi'ing wa suddi gsuli. Tuang Latala na'a ola hi'ing wa suddi gsuli. Tapi Gai suddi su'u culla ma ta'a.e
25 Wa'ang gagga ecicci Latala Gai yawa lafi, gang maqa pintar ma ta'a. Tapi wa'ang gagga Latala Gai yawa ammi wa maiya waai, maqa gang kmuki ma ta'a.”f
Tuang Yesus wapubirang inplawang e ammi qutta
26 Galla su'u Yesus birang ma ta'a akku, "Tuang Latala Gai lallang ada ma ta'a dagi inplawang lee ga gia ai maxara gammi braki. 27 Wa'ang su'u ola anna, ta'a-cira ta'a-cira, inplawang su'u wa ampata. Tapi inplawang su'u qutta ada ma ta'a lalu. 28 Inplawang su'u e ammi talaqa ta qutta, athanni biddi, buma, galla hicci wanna. 29 Kalo aalai baxori wouwa, maxara manaki mang anna tuggu qai. Tuang Latala Gai lallang na'a gsuli. Gopa'i Latala ba wa krayang.”g
Tuhan Yesus wapubirang ina bagga pata camma
(Mateos 13:31-32, 34; Lukas 13:18-19)
30 Galla su, Yesus birang ma ta'a akku, "Nang wapubirang nukku ma ta'a, gsali: Hing Tuang Latala Gai wa'ang ina su'u ga banding qauwa. Ging mulai qorunu qai, yung-yung ni, ging galla dumma ma ta'a. 31 Ga'ing su dagi ina bagga pata camma nissi. 32 Kalo ping ina bagga su'u gadu, gang qutta cira a'ing ma tee pata ada. Ba daia-daia hiila anna gfe'eng lafi ni ging suma asee ela.”
33 Yesus Gai cara wa'ang ajar su'u gi mangarti galanna. 34 Gang wa'ang gafa'a ina gi'ing ajar, Gang biasa wapubirang qai ma giabirang. Kalo gang Ai knii ina su'u gi'ing ajar, Gang wapubirang su'u gai arti gopa'i ma giabirang.
Tuang Yesus hangi ada ela axori
(Mateos 8:23-27; Lukas 8:22-25)
35 Gagga weri mo'ong, Yesus yedda hee tagga. Gang Ai knii ina su'u gitti akku, "Ma ping yiala keri qhappi soma wa.”
36 Ging galla itanapa hee tagga cira. Ni ging gia wa'ang dumma ina suma gi'ing gadu maiya. Tapi wa'ang dena hee faqa cira gialanna. 37-38 Sudana su'u, Yesus bloni mari hee gorana gammi soma Oong taxalang ta'a qurri qauwa. Yung na'a waai hangi ada anna. Bofa ada Yesus ina Gi hee su'u prutta, dano da hee gammi cukku hoyang walla. Ba Gai knii ina su'u te'i hoyang minna. Ging galla Yesus gathanni cira akku, "Namaang! Cira ni! Ning hoyang minna sa! Hang ni'ing wa riaqqu na'a waai!”
39 Watti gsuli, Yesus cira hangi mari bofa su'u gacapa akku, "Axori!” Sudana hangi mari bofa su'u na'a galla axori. 40 Galla su'u Yesus Ai knii ina su giacapa akku, "Tatali ba hi'ing gopa'i te'i gsuli? Hing Na'ing parcaya waai?”
41 Gi'ing gopa'i te'i mari ia'agaxa, ba ging iabirang akku, "Ga'ing sa yamma, ee? Hangi mari bofa na'a Gamang watti!”