Wa'ang gaya yeci apa gasaya, Tuang Yesus ela gang maxavu
(Mateos 9:1-8; Lukas 5:17-26)
2
Gai weri ranna, Yesus ola Kapernaum gia. Ba lee apa illa gopa'i birang akku, Gang se mia wouwa. 2 Ga'ing su'u ba, illa dumma gagga wa'ang qrari anna, ging i'ing tuanna ela see su'u mang bu'i. See walaga'ai na'a wa'ang i walla. Qauwa ba Yesus galla Tuang Latala Gai yawa ma giabirang. 3 Yesus yedda birang pating, wa'ang lamma uthu wa'ang gaya yeci nukku doba Gannu wa. 4 Wa'ang pata dumma ba, ging wa'ang lilla su'u ga Yesus Gannu wa gasaya. Ba ging mang see su'u tagga cira, galla Yesus Goong dana gagga see tagga suma tariaqa. Tariaqa wouwa ni, ging galla wa'ang gaya yeci illa baqa suma, ga'ing mari gai bii lunna cukku.a 5 Yesus billi ging ela gsuli, Gang klala wa'ang ina su'u ecicci Ga'ing parcaya. Ba Gang wa'ang gaya yeci su'u gabirang akku, "Nwaqa! Nang hai tmeci ina su wa api cua wa!”
6 Sudana su'u, guru agama Yahudi lamma ranna suma missi. Ging Yesus Gai birang watti, gimmi gammi sannang waai. 7 Ni ging galla iabirang akku, "Wa'ang sa pata brani birang gsuli! Tuang Latala anaqai ba wa'ang gi tmeci wa api cua qauwa. Wa'ang su'u Gai birang, ela daa waddi Ga'ing su'u Latala esamma nissi. Gang Tuang Latala Gafaya!”
8 Yesus giammi gammi klala wouwa. Ba Gang giabirang akku, "Hing hiammi gammi gsuli oli! 9-10 Gagga ta ba dia? Nang wa'ang gaya yeci sa'a gabirang akku, ‘Hai tmeci Nang wa api cua wa,’ gagga gsuli su hing klala baai, ecicci e waai. Nang galla gabirang akku, ‘Qauwa cira! Hai bii oci galla hola gia.’ Sudana qhai gang sira, ni hing galla gai bukti billi ni birang akku, Na'ing sa'a, Wa'ang gagga Mola-mola. Na'ing sa'a Nai lulla mari Nai haak Na'ing wanna wa'ang gi tmeci wa api cua.”
Wouwa su'u, Yesus wa'ang gaya yeci su gabirang akku, 11 "Hang watti, ee! Hang galla qauwa wa! Cira hei bii mari galla hola gia.”
12 Watti gsuli, wa'ang su'u galla cira, ai bii mari, galla apa gia. Wa'ang suma gopa'i iatta bagga ma gsarru. Ging gopa'i a'agaxa, galla birang, "Bah! Ning waddi ni ina sa'a billi gsali! Tuang Latala Gai lulla pata liawang!”
Tuang Yesus Lewi gatta Galanna
(Mateos 9:9-13; Lukas 5:27-32)
13 Wouwa su'u, Yesus ola dano Galilea gai tuthu gia. Wa'ang dumma Ga'ing nasi anna, ba Gang Tuang Latala Gai yawa mari giabirang.
14 Suma su'u, wa'ang nukku genu Lewi, Alpius gwaqa. Gang kantor blasteng ma krayang, blasteng banga pamrinta Roma gena gaggi. Tuang Yesus apa suma wa ba Gang ulli Lewi gsarru. Ba Gang gabirang akku, "Baa! Hang ma Nalanna ni!
Watti Yesus birang gsuli, Lewi galla cira apa Galanna.
15 Wouwa su'u, Yesus ina mari Lewi gai dena wa'ang blasteng banga waci itanapa Lewi gai see missi i naa esamma-samma. Wa'ang gagga gafa'a Yahudi gai wa'ang akku gi'ing wa'ang yeci na'a, suma itanapa missi i naa. Wa'ang gagga missi i naa su'u, dumma cukka Yesus Gai birang watti.
16 Sudana su'u partei Farisi gai guru agama lamma ranna Yesus ina gisarru ging itanapa blasteng banga waci mari wa'ang yeci ina su'u missi i naa. Ba ging Yesus Gai knii ina githaga akku, "Tatali ba hi Guru su blasteng banga waci mari wa'ang yeci ina su missi i naa esamma-esamma?”
17 Yesus watti ging tiani gsuli, ba Gang giamaragu akku, "Wa'ang lilla ba dokter lafi, wa'ang maxavu wouwa su waai. Nang anna wa'ang yeci ina su ba, urus gaggi. Nang anna wa'ang gagga birang ai diri qunna su, ging urus waai.”
Tuang Yesus Gai ajaran sfa'a, Farisi ina gi gsuli waai
(Mateos 9:14-17; Lukas 5:33-39)
18 Malla nukku su'u, partei agama Farisi gai wa'ang ina puasa pating. Ging billi Yohanes, bamma iila-srani gai knii ina na puasa pating. Tapi ging billi Yesus Gai knii ina su'u, puasa waai. Ba gi wa'ang anna Yesus Gathaga akku, "Namaang. Ning puasa pating. Yohanes gai wa'ang ina na'a puasa. Tatali ba Hei knii ina su puasa waai?”
19 Ba Yesus giamaragu akku, "Hi na klala wouwa, ukku iasi gaggi, baniaki ina su'u puasa waai. Ging mang i naa sampe gotho'o bikki. Gagga pangantin mauwa yedda suma, gi'ing gopa'i missi i naa esamma-samma. 20 Tapi malla nukku, wa'ang gafa'a dena anna pangantin mauwa su taqauwa ga gia, ba gai dena ina su'u galla giammi sussa. Su'u ni, ging galla puasa.”
21 Wouwa su'u, Yesus wapubirang nukku ma ta'a akku, "Lee nauwang sfa'a mari ma nauwang pacci wa o tappa waai. Kalo ping nauwang su buggi, nauwang sfa'a su'u a'ing keri, ela nauwang pacci traqqi ma ta'a. 22 Gagga sa'a, na'a gsuli. Lee tua waddi gaggi mari tummang weeng u ba'a mi'a waai. Waai su'u, maqa tua su'u qrari asua. Tua waddi gaggi su'u kuddi mari tummang sfa'a mi'a.”b [Birang gsuli, Yesus gi'ing ajar akku, Gai ajaran sfa'a su'u Farisi ina gi ajaran tula gaggi wa ocfiara oli.]
Tuang Yesus Gai knii ina weri krayang waai gandum tuggu
(Mateos 12:1-8; Lukas 6:1-5)
23 Malla nukku, Yahudi waci gi weri sembayang ga'asamma, Yesus ina apa maxara gara lola gia. Ba Gai knii gandum raaqu naa.c 24 Farisi gai wa'ang ulli gisarru, ba ging Yesus Gabirang akku, "Tatali ba Hei knii ina su pi atoran agama gayaya? Ging gandum tuggu pi weri krayang waai ga'asamma! Hing ela gsuli oli!”
25-26 Gang giamaragu akku, "Tatali ba gsuli? Hing pithaya Daud Gai carita hiammi ela-ela waai? Sudana su'u Abiatar ba agama Yahudi gi pata ada. Pithaya Daud mari gai knii ina su'u gi'ing pata hilling. Ba ging gia Tuang Latala Gai Tenda Sembayang gammi wa, galla roti kafala agama ina Tuang Latala Gena wouwa su'u mari naa. Gagga qunna su'u, kafala agama ina su'u ba roti su'u naa qauwa, wa'ang gafa'a su'u naa gasaya. Pithaya Daud ina roti su'u mari naa, tapi wa'ang dena na'a birang akku, ging tmeci.”d
27 Yesus giabirang ma ta'a akku, "Hing himpata oli akku, Tuang Latala weri krayang waai ela a'ing yadi berkat ma pi'ing wa'ang piomoli gaggi. Tapi Gang pi'ing wa'ang ela, su'u ni weri krayang waai gai atoran, sa'a qai galanna waai. 28 Na'ing sa'a, Wa'ang gagga Mola-mola. Na'ing ba Nai haak birang akku, wa'ang ina su'u weri krayang waai ma indena ela qauwa e, ela gasaya.”