Yusuf mari ai tuang Potifar gaggu
39
1-2 Sudana su'u, Ismail waci ina Yusuf ga Mesir gia. Suma su wa'ang ada nukku, genu Potifar. Ga'ing su, tentara raya Mesir gai istana wa yaga ina gi kfala. Potifar ba, Yusuf wa'ang dagang ina githaang gammi ma alli, mari ai see gammi gai babu. Suma mia, TUANG LATALA Yusuf gomoli, sampe gai krayang ina gopa'i gagga hasil qauwa. 3 Gai tuang billi Yusuf krayang qauwa gsuli, ba gang klala TUANG LATALA Yusuf gomoli. 4 Su'u ba, gai tuang pata Yusuf ga'ing sannang, mari ga'ing parcaya. Wouwa gang Yusuf oci mari ai see gammi gai mandor. Ga'ing na'a Yusuf gatti, ai see mari ai pusaka ina gopa'i wa urus. 5 Gsuli mulai Yusuf yadi mandor suma su, gai tuang, Mesir waci su, TUANG LATALA na'a berkat ma gena. Ba tuang Potifar gai see gammi, gai pusaka, gai maxara, mari gai krayang, gopa'i qauwa ma ta'a. 6 Sudana Potifar billi su Yusuf krayang wa urus gopa'i malas, ba gang indena na'a wa pikir waai ba su'u, gang mang klala i naa.Sudana su, Yusuf ga'ing baqqa pata malas. 7 Gang suma bangnga yung yedda, tapi Potifar gaggu gammi ga'ing ta issi wa. Ba gang Yusuf glia gata'a.
8 Tapi Yusuf atawaya. Ba gang gabirang akku, “Nwaa, hang gsuli oli! Nai tuang Potifar lulla ma nena wa, gai krayang gopa'i nang wa urus. 9 See gammi sa'a wa'ang gagga faqa lulla pinni nai gfaqqi waai. Karna nai tuang ai haak nena gopa'i wa urus. Tapi ha'ing su'u qai ba nai haak urus waai. Tatali ba nang yeci gagga gsuli wa krayang! Yeci gsuli wa krayang su, ping Tuang Latala Ga'ing lawan!”
10 Gsuli na'a su, weri-weri taiya tuang gaggu Yusuf glia lalu. Tapi Yusuf gamang watti qorunnu na'a waai.
11 Ba nukku gaggi, Yusuf see gammi wa ai krayang pinni gaggi. Weri sudana su, wa'ang nukku na'a see gammi mia waai. 12 Gai tuang gaggu ma gai konda wa pinni keri, galla gabirang akku, “Qauwa ma! Waddi sa pimraqqu qai. Ma pimraqqu piata'a.”
Tapi Yusuf atawaya. Gang apakki sampe gai konda a'ing acci. Wouwa gang biri rahang gia. Tapi alla su yedda Yusuf gai konda athaang ma pinni lalu.
13 Sudana Potifar gaggu billi, Yusuf biri cukku, ai konda mari maiya, 14-15 gang wuara wa'ang krayang ina gitta, galla giabirang akku, “Wooi! Hi'ing gopa'i anna billi ni! Waddi Ibrani gai mauwa su nai kamar gammi ma. Gang na'ing wa gsaya gaggi, ba nang wuara cilaka-laka. Sa, gang ai konda mari maiya, galla biri cukku. Nanning su, wa'ang yeci ga anna ela pitti maniang!”
16 Qauwa ba Potifar gaggu konda su pinni, sampe ganning ola anna. 17 Gsuli ganning anna, gang carita akku, “Bamma! Ibrani waci gagga hang ga anna su, waddi nai kamar gammi ma, gang na'ing paksa nata'a gaggi! 18 Tapi nang wuara cilaka-laka wa'ang gatta. Wouwa gang biri iata, ai konda sa'a mari maiya.”
19 Potifar watti gaggu carita gsuli, gang pata karang. 20 Ba gang wa'ang gitti gia Yusuf gfinni. Ging galla ga'ing mari raya gai bui gammi gadu.
21 Tapi TUANG LATALA Yusuf ampata waai. Su'u ba, TUANG LATALA gomoli lalu, sampe bui gai kfala su pata ga'ing sannang. 22 Gang Yusuf parcaya. Ba gang Yusuf haak ma gena, ba wa'ang bui gammi gopa'i wa urus, mari krayang suma su gopa'i urus. 23 Kfala galla bui gai urusan ina talalu wa urus waai. TUANG LATALA Yusuf gomoli lalu, ba krayang bui gaggi su gopa'i qauwa.